ग्लोबल टीचर रणजितसिंह डिसले राज्यात राबविणार ‘शिक्षक प्रेरणा कार्यशाळा’ : आता शिक्षणामध्ये होणार आमूलाग्र बदल

कोल्हापूर : ग्लोबल टीचर पुरस्कार विजेते शिक्षक रणजितसिंह डिसले यांच्या माध्यमातून राज्यात आता सर्व जिल्ह्यांमध्ये ‘शिक्षक प्रेरणा कार्यशाळा’ उपक्रम राबविण्यात येणार आहे. डिसले यांच्या कार्यातून सर्व शिक्षकांना प्रेरणा मिळावी तसेच शिक्षणातील आधुनिक तंत्रज्ञानाचा सर्वांना परिचय व्हावा यासाठी जिल्ह्यांमध्ये जाऊन डिसले या कार्यशाळांमध्ये मार्गदर्शन करणार आहेत. त्यांच्या माध्यमातून शिक्षणामध्ये आमूलाग्र बदल होण्यास मदत होईल, अशी माहिती ग्रामविकास मंत्री हसन मुश्रीफ यांनी दिली.

तंत्रज्ञानातील नावीन्यपूर्ण प्रयोग व असामान्य कार्य यामुळे सोलापूर जिल्हा परिषदेतील प्राथमिक शिक्षक  डिसले यांची जगातील सर्वोत्तम शिक्षक म्हणून निवड झाली असून त्यांना ग्लोबल टीचर पुरस्कार मिळाला आहे. असा पुरस्कार मिळविणारे ते पहिले भारतीय शिक्षक आहेत. डिसले हे ‘व्हर्च्युअल फिल्ड ट्रिप’ या आगळ्या वेगळ्या शैक्षणिक उपक्रमाच्या माध्यमातून जगभरातील १४३ हून अधिक देशातील १४०० पेक्षा जास्त शाळांतील मुलांना शिकविण्याचे काम करीत आहेत. 

हेही वाचा- पेट्रोल-डिझेल होणार आता शंभर रुपये लिटर ; दर राहणार चढेच

जिल्हा परिषदांनी या उपक्रमामधून कार्यक्रम निश्‍चित करावा, अशा सूचना मुख्य कार्यकारी अधिकारी यांना दिल्या आहेत. या उपक्रमाच्या माध्यमातून डिसले यांनी शिक्षकांना प्रभावी शिक्षण देण्याबाबत मार्गदर्शन करावे, असे आवाहन मुश्रीफ यांनी केले आहे.

संपादन- अर्चना बनगे