पानसरे हत्या प्रकरणी 21 ऑगस्टला पुढील सुनावणी ; संशयितांना जामीन मिळणार की नाही? 

कोल्हापूर - ज्येष्ठ नेते गोविंद पानसरे हत्येतील संशयित आरोपी सचिन अंदुरे आणि भरत कुरणे या दोघांच्या जामीन अर्जावर आज सरकारी पक्षातर्फे युक्तीवाद झाला. सत्र न्यायालयात विशेष सरकारी वकील शिवाजीराव राणे हे प्रत्यक्षात हजर होते तर दुसरे विशेष सरकारी वकील हर्षद निंबाळकर हे व्हिडिओ कॉन्फरन्सद्वारे सहभागी झाले होते.

युक्तीवादात अंदुरे आणि कुरणे यांचा अप्रत्यक्ष पानसरे हत्येचा कट रचण्यामध्ये सहभाग आहे. त्यांना जामीन दिल्यास साक्षीदारांवर दबाब येऊ शकतो, त्यामुळे त्यांचा जामीन अर्ज फेटाळावा, अशी मागणी करण्यात आली. जिल्हा व सत्र न्यायाधीश बी. डी. शेळके यांच्या समोरही आज दुपारी ही सुनावणी झाली. दोन तासांहून अधिक काळ ही सुनावणी सुरू होती. पुढील सुनावणी 21 ऑगस्टला होणार आहे. 

ज्येष्ठ नेते पानसरे यांच्या हत्येनंतर पोलिसांनी संशयित समीर गायकवाड, विरेंद्रसिंह तावडे यांच्यासह 12 जणांवर गुन्हे दाखल केले आहेत. यातील संशयित सारंग आकोळकर, विनय पवार या दोघांचाही अद्याप शोध सुरू आहे. दरम्यान, कारवाई केलेल्या संशयित सचिन अंदुरे आणि भरत कुरणे यां दोघांनीही जामीन मिळावा यासाठी जिल्हा व सत्र न्यायालयात अर्ज दाखल केला होता. त्या अर्जावर आज न्यायालयात सुनावणी झाली. 

हे पण वाचा - मोठी बातमी; कोल्हापूरमध्ये होणार मूसळधार पाऊस

दरम्यान, आजपर्यंत अल्पवयीन साक्षीदारास धमकावणे, हत्येतील मोटारसायकल कोल्हापुरात आणणे, हत्येच्या कटात प्रत्यक्ष-अप्रत्यक्ष सहभागी होणे, बेळगावंच्या एस.टी.स्टॅण्डवर झालेल्या बैठकीला उपस्थित रहाणे, अशा अनेक ठिकाणी दोघांचा संबंध येत असल्याचे तपासात पुढे आले आहे. त्यामुळे त्यांचा जामीन मिळण्याचा अर्ज फेटाळावा, अशी मागणी केली असल्याचे ऍड. शिवाजीराव राणे यांनी सांगितले. ऍड. निंबाळकर यांनी व्हिडिओ कॉन्फरन्सद्वारे पुण्यातून सुनावणी मध्ये सहभागी होऊन बाजू मांडल्याचेही ऍड.राणे यांनी सांगितले. 

संपादन- धनाजी सुर्वे