परतीच्या पावसाची हजेरी : कोल्हापुरात पावसाचा पुन्हा जोर 

कोल्हापूर : परतीच्या पावसाने आज पुन्हा शहरात चांगलीच हजेरी लावली. दुपारी साडेबाराला सुरू झालेला हा पाऊस सुमारे तास-दीड तास संततधार कोसळत राहिल्याने सर्वत्र पाणीच पाणी असे चित्र राहिले. दरम्यान, गेली चार दिवस कडकडीत उन्हाचा तडाखा शहराने अनुभवला. मात्र, आजच्या पावसाने पुन्हा गारवा निर्माण झाला. 

हेही वाचा - व्यापाऱ्यांनो ‘जीएसटी’ भरा सहज आणि सोप्या पध्दतीने
नऊ सप्टेंबरला रात्री शहराला पावसाने चांगलेच झोडपले होते. शहर आणि उपनगर परिसरातील अनेक गल्ल्यांत पाणी घुसले आणि मोठे नुकसान झाले. ढगफुटीसदृश्‍य या पावसाने दोन दिवस जोरदार हजेरी लावली. त्यानंतर मात्र पावसाची तुरळक हजेरी होती. आजची सकाळ उजाडली तीच ढगाळ वातावरणाने. सकाळपासूनच हवेत गारवा होता. दुपारी साडेबाराच्या सुमारास पावसाच्या जोरदार सरी कोसळू लागल्या. दरम्यान, शनिवार असल्याने बाजारपेठेत चांगली गर्दी होती. मात्र, पावसामुळे सर्वांचीच तारांबळ उडाली. 

संपादन -  अर्चना बनगे