फ्रॉड ओळखपत्राचा वाढला सुळसुळाट ; कोण काय करतंय म्हणत वावरतात बिनधास्त.....

इचलकरंजी (कोल्हापूर) : कोरोनाच्या पार्श्‍वभूमीवर शहरात लॉक डाऊन असल्यामुळे सर्व सामान्य नागरिकांना रस्त्यावर वावरणे सहजसोपे राहिलेले नाही. त्यामुळे यातून पळवाट म्हणून कांही नागरीक बनावट अथवा कालबाह्य झालेल्या ओळखपत्रांचा वापर करुन शहरात बिनधिक्कतपणे वावरत आहेत. इतकेच नव्हे तर औषध व अत्यावश्यक सेवा असे फलक लावून प्रशासनाची दिशाभूल करण्यात येत आहे. यामुळे लॉक डाऊनच्या कालावधीत शहरातील रस्त्यावर नाहक वर्दळ वाढत असल्याचे चित्र दिसून येत आहे.

कोरोनाचा संसर्ग टाळण्यासाठी प्रशासन पातळीवरुन विविध उपाय योजना करण्यात येत आहेत. यासाठी लॉक डाऊन करण्यात आल्यामुळे अत्यावश्यक सेवा वगळता सर्व व्यवहार बंद ठेवण्यात आले आहेत. सकाळच्या सत्रात लॉक डाऊन शिथील करण्यात आले आहे. पण नाहक दुचाकी घेवून रस्त्यावर येणार्‍या नागरिकांवर कारवाई करण्यात येत आहे. तसेच दिवसभरात नाहक रस्त्यावर दिसल्यास गुन्हा दाखल करण्यात आहे. पण या कारवाईपासून बचाव करण्यासाठी बनावट अथवा कालबाह्य ओळखपत्राचा वापर केला जात आहे.

हेही वाचा- इस्लामपूरमधील तब्बल १२०० कोटींची उलाढाल ठप्प

कोण कारवाई करीत नाहीत म्हणत

गळ्यात ओळखपत्र अडकले की कोण कारवाई करीत नाहीत, असा समज पसरला आहे. त्यामुळे अगदी कालबाह्य झालेली ओळखपत्रे देखील गळ्यात घालून फिरणार्‍यांची संख्या वाढली आहे. यामध्ये राजकीय क्षेत्रातील मंडळी मोठ्या प्रमाणात दिसत आहेत. माध्यम प्रतिनिधींना लॉक डाऊनमधून वगळण्यात आले आहे. त्याचाही गैरफायदा घेण्यास कांहीजणांनी सुरुवात झाली आहे. माध्यमांशी किंचतही संबंध नसलेले अनेकजण पोलीस यंत्रणेसमोर रुबाबात फिरत आहेत. अत्यावश्यक सेवा असे फलक लावून अनेक वाहने फिरतांना दिसत आहेत. प्रत्यक्षात मात्र कांही अंशी या माध्यमातूनही प्रशासनाची दिशाभूल करण्यात येत असल्याचे दिसत आहे.

हेही वाचा-  ‘ओन्ली ॲडमिन कॅन सेंड मेसेज’ ​

पेट्रोल पंपावर होतोय गैरवापर
सध्या पेट्रोल पंपावर फक्त अत्यावश्यक सेवेतील वाहनांना पेट्रोल दिले जात आहे. अशावेळी बनावट ओळखपत्रांचा सर्रास वापर करुन वाहनांमध्ये पेट्रोल भरुन घेतले जात आहे. यातून वरकमाई देखील केली जात असल्याची चर्चा होत आहे.