कोल्हापूर ; लघुशंकेसाठी थांबलेल्या तरूणाला लुटले

कोल्हापूर - तरुणाला मारहाण करून त्याच्या खिशातील रोकडसह मोबाईल संच लुटून नेणाऱ्या दोघा लुटारूंचा अवघ्या तासाभरात शाहूपुरी पोलिसांनी छडा लावला. गुन्हे शोध पथकाने पाठलाग करून दोघांना ताब्यात घेतले. त्याच्याकडून लुटीतील साडेसहाशेची रोकडसह मोबाईल संच जप्त केली. सचिन गोरख जाधव (वय 25, रा. रिंगरोड आयोध्या कॉलनी) आणि संग्राम अनिल खामकर (वय 22, रा. टाकाळा) अशी अटक केलेल्या संशयितांची नावे आहेत. 

याबाबत पोलिसांनी दिलेली माहिती अशी, राम परवेज कुमार (वय 24, मूळ रा. झारखंड सध्या रा. गांधीनगर) हा मजुरी करतो. मध्यरात्री तो मध्यवर्ती बसस्थानक परिसरात लघुशंकेसाठी उभा होता. त्यावेळी एका काळ्या रंगाच्या मोपेडवरून 20 ते 25 वयोगटातील दोघे लुटारू त्याच्याजवळ आले. त्या दोघांनी कुमारला मारहाण केली. त्यानंतर त्याच्या खिशातील 650 रुपयाची रोकड व मोबाईल संच असा एकूण 18 हजार 650 रूपयाचा ऐवज जबरदस्तीने हिसकावून घेतला. त्यानंतर ते दोघे मोपेडवरून पसार झाले. हा प्रकार कुमार यांनी शाहूपुरी पोलिस ठाण्यात येऊन सांगितला. त्यानुसार पोलिस निरीक्षक श्रीकृष्ण कटकधोंड यांच्या मार्गदर्शनाखाली गुन्हे शोध पथकातील सहायक फौजदार प्रकाश भंडारेसह सागर माने, दिग्विजय चौगले, कृष्णात पोवार, प्रथमेश पाटील यांच्या पथकाने लुटारूंचा शोध सुरू केला. ताराराणी चौक परिसरात एक लुटारू मोपेडवरून उतरून बागेत जाऊन लपून बसला. हे पथकाच्या लक्षात आले. पथकाने त्याला ताब्यात घेतला. 

हे पण वाचा - बदली होऊन झाला महिना  नियुक्ती मात्र प्रतीक्षेतच 

दरम्यान, काही वेळाने त्याचा एक साथिदार पुन्हा मोपेड घेऊन तेथे साथिदाराला नेण्यासाठी आला. त्यालाही पोलिसांनी ताब्यात घेतले. त्या दोघांनी आपली नावे सचिन जाधव, संग्राम खामकर असल्याचे सांगितले. त्या दोघांकडून लुटून नेलेला मुद्देमाल जप्त केला. 

संपादन - धनाजी सुर्वे