कोल्हापुरात आढळला दुर्मिळ चित्रबलाक

कोल्हापूर : दुर्मिळ होत चाललेला चित्रबलाक किंवा चाम ढोक (पेंटेड स्टॉर्क) नावाने ओळखला जाणारा पक्षी उत्तरेश्वर पेठ येथे जखमी अवस्थेत आढळला. करकोचा कुळातील हा पक्षी. साधारण पाच किलोच्या आसपास वजन असणाऱ्या या चित्रबलाकवर केअर संस्थेत उपचार सुरू आहेत. या पक्ष्याच्या पंखाला गंभीर दुखापत झाली आहे. 

भारत, पाकिस्तान, श्रीलंका, नेपाळ, बांगलादेश, म्यानमारमध्ये रहिवास करणारा आणि स्थलांतर करणारा हा पक्षी दलदली, सरोवरे, भाताच्या शेतीचा प्रदेशात आढळतो. पाण्यात उभा राहून मासोळ्या, बेडूक, साप, गोगलगाय वगैरे पाण्यातील जीव खाऊन याची गुजराण होते. या पक्षाच्या शिकारीमुळे हा पक्षी दुर्मिळ होत चालला आहे. पक्षाला केअर संस्थेच्या मिलिंद जगनाडे, राघव सरदेसाई यांनी पकडून उपचारासाठी दाखल केले. त्याच्यावर संस्थेतील पक्षीतज्ज्ञ गणेश कदम उपचार करत आहे. पाण्यातील किंवा पाण्याजवळील मोठ्या झाडांवर मोठे घरटे बनवतो. एका चित्रबलाकच्या घरट्याला लागूनच दुसऱ्याचे घरटे बांधले जाते. तसेच त्याच झाडावर किंवा परिसरात इतर बगळे, करकोचे आपापली घरटी दाटीवाटीने बांधतात. 

हेही वाचा- भेंडीनेही खाल्ला भाव : दराने घेतली दीडशेची धाव -

दोन आठवड्यापूर्वी दुर्मिळ काळमांजरचा वावर याच परिसरामध्ये आढळला होता. तर याच परिसरामध्ये चित्रबलाकही आढळला आहे. दोन्हीही घटनांमध्ये हे प्राणी जखमी अवस्थेत रस्त्यावर आढळले आहेत. 

कोल्हापुरातील जैववैविधता येथील पोषक वातावरणाचे प्रतीक आहे. गेल्या काही दिवसांत अनेक दुर्मिळ जीव आढळले आहेत. यांचे एकीकडे जतन करण्यासाठी प्रयत्न होत असताना दुसरीकडे येथील अधिवासात या जीवांचा वाढता सहवास हे चांगले संकेत आहेत.
- संयोगिता देसाई-माने, संस्थापिका, केअर

संपादन - अर्चना बनगे