जयसिंगपूर (कोल्हापूर) : राज्यपाल नियुक्त विधानपरिषदेवर अखेर माजी खासदार राजू शेट्टी यांच्या नावावर शिक्कामोर्तब झाले. बारामतीत राष्ट्रवादीचे अध्यक्ष शरद पवार आणि शेट्टी यांच्यातील बैठकीत अपेक्षेप्रमाणे ही निवड झाली. स्वाभिमानीला एक जागा देण्याचा शब्द श्री पवार यांनी पाळला.
लोकसभा निवडणूकीत श्री पवार यांनी शेट्टी यांना विधानपरिषदेची एक जागा देण्याचा शब्द दिला होता. विधानपरिषद निवडणूकीच्या काळात याबाबत श्री शेट्टी यांनी पत्र लिहून याची आठवण करुन दिली होती. यानंतर मंत्री जयंत पाटील यांनी शेट्टी यांची भेट घेऊन हा प्रस्ताव ठेवला. यानंतर श्री शेट्टी यांनीच विधानपरिषदेवर जावे यासाठी पक्षांतर्गत पदाधिकाऱ्यांचा आग्रह होता. लोकसभा आणि विधानसभा निवडणुकीनंतर पक्षाची काहीशी पिछेहाट झाली असून या काळात श्री शेट्टी यांनीच हे पद घ्यावे असा त्यांच्यावर दबाव निर्माण झाला होता.
श्री पवार कोकण दौऱ्यावर असल्याने चर्चा लांबणीवर पडली होती. कोकण दौऱ्यावरुन परतल्यानंतर बारामतीत गोविंदबाग यांच्या निवासस्थानी झालेल्या बैठकीत शेट्टी यांच्या नावावर एकमत झाले. राज्यपाल नियुक्त म्हणून विधानपरिषदेवर सामाजिक क्षेत्रातून श्री शेट्टी यांची वर्णी लागणार आहे. पक्षातील अन्य कोणाचेही नाव पुढे केले असते तर मात्र कदाचित तांत्रिक मुद्दाही पुढे आला असता. त्यामुळे शेट्टींनाच या पदावर संधी देण्यावर श्री पवार आग्रही राहिले. दिर्घ काळ झालेल्या या चर्चेत शेट्टी यांच्या नावावर एकमत झालेच. शिवाय श्री पवार यांनी शेट्टींचा पाहुणचार करताना गोविंदबागही फिरून दाखविली. यावेळी खासदार सुप्रिया सुळे, राष्ट्रवादीचे सेक्रेटरी चंगेजखान पठाण उपस्थित होते. दरम्यान, सध्या अडचणीच्या काळात शेट्टींमुळे पक्षाच्या कार्यकर्त्यांना उभारी मिळाली आहे.
हे पण वाचा - लग्न होणार आता वाजत गाजत ; मिळालीय ही परवानगी...
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.