केंद्रिय लोकसेवा आयोगाच्या परीक्षेत कोल्हापुरच्या मुलींचा झेंडा 

कोल्हापूर : केंद्रिय लोकसेवा आयोगाच्या परीक्षेत नेर्ली (ता. करवीर) येथील डॉ. प्रणोती संजय संकपाळ आणि राजारामपुरीतील गौरी नितीन पुजारी यांनी यशाचा झेंडा फडकवला. प्रणोतीने दुसऱ्या तर गौरीने तिसऱ्या प्रयत्नात यश मिळवले. 

डॉ. प्रणोतीचे नेर्ली शालेय शिक्षण तवनाप्पा पाटणे हायस्कूलमधून झाले. तिने दहावीला ९५, तर विवेकानंद महाविद्यालयातून विज्ञान शाखेतून ८९ टक्के गुण मिळविले. सांगलीतील भारती विद्यापीठातून बीडीएसचा अभ्यासक्रम पूर्ण केल्यानंतर तिने २०१७ला स्पर्धा परीक्षेच्या अभ्यासाला सुरुवात केली. पहिल्या प्रयत्नात अपयश आल्यानंतर खचून न जाता तिने पुन्हा अभ्यासाचे वेळापत्रक बदलले. तिने २०१९ ला झालेल्या परीक्षेत दुसऱ्या प्रयत्नातच यश मिळवले. ती ५०१ रॅंकने उत्तीर्ण झाली. डॉ. प्रणोती शेतकरी कुटुंबातील असून, तिने पुण्यात अभ्यास केला. परीक्षेसाठी आवश्यक तितका अभ्यास करत सातत्याने उजळणी करण्यावर तिचा भर राहिला. तिने मुलाखतीची तयारी दिल्लीमध्ये केली.

हे पण वाचा - कोणत्याही क्लासशिवाय कोल्हापूरच्या पठ्ठ्याने मिळविले यूपीएससीत लखलखीत यश

 गौरी पुजारी राजारामपुरीतील रहिवासी असून ती २७५ रॅंकने उत्तीर्ण झाली आहे. तिसऱ्या प्रयत्नात तिने यश खेचून आणले आहे. तिचे शालेय शिक्षण उषाराजे गर्ल्स हायस्कूलमधून झाले असून तिने दहावीला ९८.७३, तर विवेकानंद महाविद्यालयातून विज्ञान शाखेत बारावीला ९६.०५ टक्के गुण मिळविले आहेत. 
जेनेसिस इन्स्टिट्युट ऑफ टेक्नॉलॉजीमधून तिने बी.ई. मेकॅनिकल अभ्यासक्रमात ८५ टक्के गुण मिळविले. 

हे पण वाचा - स्वरूपाच्या यशाला कष्टाची उकळी, चहाच्या टपरीवर वडिलांना मदत करीत मिळविले 75 टक्के गुण  

पुण्यातील ज्ञानप्रबोधिनीमध्ये तिने स्पर्धा परीक्षेचा अभ्यास केला. दिल्लीत ती सहा महिने मुलाखतीच्या तयारीसाठी होती. तिचे वडील प्रा. नितीन पुजारी संजय घोडावत इन्स्टिट्युटमध्ये कार्यरत आहेत, तर आई निलजा गृहिणी आहेत. 

संपादन - धनाजी सुर्वे