हनीमूनला गेल्यावर पतीला झाला कोरोना ; हे समजताच नववधू गेली पळून...

बंगळूर - येथील अभियंत्याचे नुकतेच लग्न झाल्यानंतर हे जोडपे हनीमूनसाठी ग्रीस येथे गेले होते. पण, विदेश फिरून येताना पतीला कोरोनाची लागण झाल्याचे स्पष्ट झाले. देशात परत आल्यावर पतीला कोरोनाची लागण झाल्याचे निदान स्पष्ट झाल्यावर नववधूने पतीची लागण आपल्याला होईल, या भीतीने आग्रयाला पलायन केले. राज्यातील अधिकाऱ्यांनी तिचा शोध घेतल्यानंतर तिलाही कोरोनाची लागण झाल्याचे स्पष्ट झाले आहे. दरम्यान, पतीची प्रकृती आता सुधारली असल्याचे सांगण्यात आले.

धास्ती घेऊन नववधूने काढला पळ

याबाबत माहिती अशी - एका प्रतिष्ठीत कंपनीत अभियंता असलेल्या तरुणाचे नुकतेच लग्न झाले होते. त्यानंतर अलीकडेच हे जोडपे हनीमूनसाठी ग्रीसला गेले होते. त्यानंतर ते बंगळूरला परतले. येथे परदेशातून आलेल्यांच्या तपासणीत अभियंत्याला कोरोना व्हायरस चा संसर्ग झाल्याचे स्पष्ट झाले. त्यानंतर त्याच्यावर स्वतंत्र खोलीत उपचार सुरू करण्यात आले याप्रकरणाची धास्ती घेऊन नववधूने पळ काढला. त्यामुळे अधिकाऱ्यांत गोंधळ उडाला. अखेर तिचा आग्रा येथील निवासस्थानी शोध घेण्यात आला. तिची तपासणी केली असता तिलाही कोरोनाव्हायरसची लागण झाल्याचे उघड झाले आहे.

वाचा - दुबईहून तो आला कोल्हापूरात अन् नाके बंद करुन त्याला घेतले ताब्यात...
 

अधिकाऱ्यांनी गाठले आग्रा

महिला आग्रा येथे गेली असल्याचे समजताच बंगळूरच्या अधिकाऱ्यांनी लगेच उत्तर प्रदेश सरकारच्या अधिकाऱ्यांना सतर्क केले होते. नंतर आरोग्य विभागाच्या अधिकाऱ्यांनी महिलेच्या आग्रा येथील घरास भेट दिली. तथापि, महिलेच्या कुटुंबातील सदस्यांनी तपासणीला प्रतिसाद दिला नाही. त्यानंतर अधिकाऱ्यांनी तेथील पोलिसांना बोलावले आणि एका स्वतंत्र खोलीत त्या महिलेची तपासणी केली. त्यात तिलाही कोरोना विषाणूची लागण झाल्याचे उघड झाले.