"या' गावातील सरपंच पुत्रावर ऍट्रॉसिटी कायद्याअंतर्गत गुन्हा दाखल

कोरवली (सोलापूर) : जामगाव (ता. मोहोळ) येथील सरपंचाचा पुत्र नामदेव मारुती डांगे याच्यावर जातिवाचक शिवीगाळ करून मारहाण केल्या प्रकरणी ऍट्रॉसिटी अंतर्गत कामती पोलिस ठाण्यात गुन्हा दाखल झाला आहे. 

हेही वाचा : "अधिकाऱ्यांचं कुटुंब' ! वडील पोलिस, भाऊ तहसीलदार, बहीण आयएएस तर दुसरी सहाय्यक संचालक 

याबाबत श्रीकांत मच्छिंद्र गायकवाड (रा. जामगाव, ता. मोहोळ) यांनी दिलेल्या फिर्यादीनुसार, श्रीकांत गायकवाड यांची पत्नी कांचन श्रीकांत गायकवाड या विद्यमान ग्रामपंचायत सदस्या आहेत. शनिवारी (ता. 22) ग्रामपंचायतीचे शिपाई नन्नवरे हे पाणीपट्टी व घरपट्टी भरण्याची दवंडी देण्यासाठी भीमनगर येथे आले असता, श्रीकांत गायकवाड यांनी "आमच्या भीमनगरमध्ये पाणी सोडत नाहीस मग पाणीपट्टी भरा कसे म्हणतोस' असे विचारले होते. दुसऱ्या दिवशी रविवारी (ता. 23) सकाळी श्रीकांत गायकवाड हे स्वतःच्या घरासमोर उभे राहिले असता सरपंचाचा पुत्र नामदेव डांगे याने "तू काल ग्रामपंचायत शिपायास काय म्हणालास, तुला माज आला आहे का? तुला मी बघतो' असे म्हणून निघून गेला. 

हेही वाचा : स्वत:चे शिक्षण सोडून बहिणीला शिकवले, पण शहीद सैनिकाचे अधुरेच राहिले स्वप्न 

तेव्हा घडला प्रकार श्रीकांत गायकवाड यांनी सरपंच यांच्या कानावर घालण्यासाठी सायंकाळी गावचे सरपंच मारुती श्रीकांत डांगे व आरोपीचा मामा संजय धोंडीबा हाके यांच्याकडे जाऊन सांगत असताना नामदेव मारुती डांगे हा तेथे आला व त्याने श्रीकांत गायकवाड यांच्या शर्टची गच्ची धरून त्यांना जातिवाचक शिवीगाळ करून, तुझी काय लायकी आहे, असे म्हणून हातातील लोखंडी रॉडने मारहाण करून जखमी केले. त्या वेळी श्रीकांत गायकवाड यांच्या गळ्यातील सोन्याची साखळी तुटून गहाळ झाली आहे, अशा आशयाची फिर्याद कामती पोलिस ठाण्यात दाखल झाली आहे. घटनेचा पुढील तपास कामती पोलिस ठाण्याचे सहाय्यक पोलिस निरीक्षक किरण उंदरे यांच्या मार्गदर्शनाखाली प्रभाकर शिंदे हे करीत आहेत. 

संपादन : श्रीनिवास दुध्याल