केंद्रीय पथकाची मोहोळ तालुक्‍यातील नुकसानीची पाहणी ! शेतकऱ्यांनी मांडली वस्तुस्थिती

मोहोळ (सोलापूर) : मोहोळ तालुक्‍यात आक्‍टोबरमध्ये झालेल्या अतिवृष्टी व पुराच्या पाण्याने झालेल्या नुकसानीची पाहणी केंद्रीय दोन सदस्यीय पथकाने मंगळवारी केली. त्यांनी नुकसानी संदर्भात शेतकऱ्यांशी संवाद साधला. 

14 व 15 ऑक्‍टोबर रोजी मोहोळ तालुक्‍यात अतिवृष्टी व पुराच्या पाण्याने शेतकऱ्यांचे मोठे नुकसान झाले. सुमारे 800 जनावरे वाहून गेली, ऊस, केळी, मका या पिकांसह डाळिंब, पेरू, द्राक्ष या फळबागांचेही नुकसान झाले. अनेक जमिनी खरडून गेल्या. मोटारी, पाइपलाइन व घरे वाहून गेली. तहसीलदार जीवन बनसोडे यांनी तातडीने पंचनामे करून शासनाकडे नुकसान भरपाईचा आराखडा पाठविला. त्यापैकी पहिल्या टप्प्यात 21 कोटी रुपये तालुक्‍याला मिळाले. 

मंगळवारी सकाळी केंद्रीय पाहणी पथक मोहोळ तालुक्‍यातील लांबोटी येथे आले. त्यांनी तेथील तात्या चंदनशिवे यांच्या पूर्ण आडवा झालेल्या उसाची पाहणी केली व त्यांच्याशी संवाद साधला. कोळगाव येथे बंधाऱ्यावरूनच सतीश देशमुख व पांडुरंग देशमुख यांच्या शेतीची पाहणी केली. त्या ठिकाणी महावितरणचे पडलेले खांब उभे करण्याचे काम सुरू होते. तसेच खचलेल्या रस्त्याची पाहणी केली. 

दुपारी साडेबारा वाजता पथक पेनूर येथील फुलाबाई सुखदेव माने, विजयाराणी सुरेश चव्हाण, भारत दत्तात्रय सलगर यांच्या शेताकडे गेले. विजयाराणी चव्हाण यांच्या मका व इतर शेतीची पाहणी केली. भारत सलगर यांच्या केळी बागेची पाहणी केली. पाऊस कधी पडला, उत्पन्न काय निघाले का नाही, शेतात पाणी किती दिवस होते, असे प्रश्न पथकाने शेतकऱ्यांना विचारले. त्यावर फुलाबाई माने यांचे चिरंजीव कैलास माने यांनी पिकात दीड महिना पाणी असल्याचे सांगितले. सलगर यांच्याशीही संवाद साधला. मागील उत्पन्न किती आले होते, नुकसान व खर्च वजा जाता हातात काय राहिले काय, असे प्रश्न पथकाने विचारले. मात्र शेतकऱ्यांनीही धीटपणे वस्तुस्थिती सांगितली. 

या वेळी जिल्हाधिकारी मिलिंद शंभरकर, प्रांत अधिकारी सचिन ढोले, तहसीलदार जीवन बनसोडे, वरिष्ठ लिपिक अमित कलेटवाड, जिल्ह्यातील सर्व विभागांचे वरिष्ठ अधिकारी तसेच कर्मचारी हातात फायली घेऊन सज्ज होते. पेनूर येथे माजी उपसभापती मानाजी माने, माजी सरपंच रमेश माने, शिवसेनेचे माजी तालुका प्रमुख चरणराज चवरे हे उपस्थित होते. 

संपादन : श्रीनिवास दुध्याल