ठिणगी....! खासदार महास्वामींवरून काॅंग्रेसमध्ये मतभेद 

सोलापूर :  खासदार डॉ. जयसिद्धेश्‍वर महास्वामी यांचे जात प्रमाणपत्र जात पडताळणी समितीने सोमवारी अवैध ठरवले. त्याचे स्वागत करत उत्तर सोलापूर तालुका कॉंग्रेसच्या पदाधिकारी व कार्यकर्त्यांनी पेढे वाटून आनंद व्यक्त करीत कॉंग्रेस भवनसमोर जल्लोष केला. मात्र त्यास पक्षांतर्गत मतभेदाची ठिणगी पडली.

आधी हे वाचा - खासदार डाॅ. जयसिद्धेश्वर महास्वामी यांचे जातप्रमाणपत्र अवैध 

डॉ. महास्वामी यांच्या जातीचा दाखला अवैध ठरल्याचे समजल्यावर तालुकाध्यक्ष प्रा. डॉ. सिद्राम सलवदे यांच्या नेतृत्वाखाली कॉंग्रेस भवनसमोर पेढे वाटून तसेच फटाक्‍यांची आतषबाजी करून जल्लोष करण्यात आला. यावेळी भाजपच्या निषेधाच्या घोषणाही देण्यात आल्या. यावेळी अनुसूचित जाती विभागाचे शहराध्यक्ष एन. के. क्षीरसागर, अशोक लांबतुरे, माजी नगरसेवक हारूण शेख, उपाध्यक्ष अंबादास गुत्तीकोंडा, सोपान थोरात, मुन्ना कोडले, इम्तीयाज बेलीफ, अजिनाथ कांबळे, उमाकांत येरवडे, विनोद रणशुरे, भगवान साखरे, महेश जावळे, सूर्यकांत व्हनकडे, उत्तमकुमार वाघमारे, बाळासाहेब नवगिरे, कुंडलिक जाधव, बलभीम कांबळे, आकाश राठोड उपस्थित होते. 

हेही वाचा - कोरोना व्हायरसपासून बचावासाठी घ्या ही दक्षता

जल्लोषाचा कार्यक्रम सुरु असताना कॉंग्रेसच्या शहर पदाधिकाऱ्यांपैकी कुणीही उपस्थित नव्हते. या संदर्भात कानोसा घेतला असता, जल्लोषाला शहर पदाधिकाऱ्यांचा विरोध असल्याचे सांगण्यात आले. डॉ. सलवदे म्हणाले,""भाजपने स्वतःच्या स्वार्थासाठी जयसिद्धेश्‍वर महास्वामींनी अडचणीत आणले आहे. जातीचा बोगस दाखला काढायला लावून निवडणूक लढवायला भाग पाडले. आता जात प्रमाणपत्र अवैध ठरल्याने त्यांची गोची झाली आहे.'' या प्रकाराबाबत शहराध्यक्ष प्रकाश वाले यांनी प्रतिक्रिया दिली नाही.