बाळासाहेबांच्या स्मारकासाठी नगरसेवक देणार मानधन...महापालिका कोणती वाचा 

सोलापूर : शिवसेनाप्रमुख (स्व.) बाळासाहेब ठाकरे यांच्या स्मारकासाठी पुरेसा निधी उपलब्ध व्हावा या हेतूने शिवसेनेच्या सर्व नगरसेवकांनी कार्यकाळ पूर्ण होईपर्यंत मानधन द्यावे, असे आवाहन जिल्हाप्रमुख गणेश वानकर यांनी केले. महापालिका निवडणुकीपर्यंत तब्बल 60 लाखांचा निधी त्यातून उपलब्ध होईल, असेही ते म्हणाले. दरम्यान, महापालिकेची आर्थिक स्थिती बिकट असल्याने तीनवेळा निवीदा काढूनही मक्‍तेदारांनी निवीदाच भरली नसल्याचेही या वेळी सांगण्यात आले. 

हेही नक्‍की वाचा : माहिती आहे का...केंद्रीय कृषी अभ्यास समितीचा नुसताच महाराष्ट्र दौरा 

बाळासाहेब ठाकरे यांच्या जयंतीच्या पार्श्‍वभूमीवर मंगळवारी (ता. 21) शासकीय विश्रामगृह येथे शिवसेना पदाधिकाऱ्यांची बैठक पार पडली. या वेळी जिल्हाप्रमुख पुरुषोत्तम बरडे, जिल्हाप्रमुख वानकर, शहरप्रमुख गुरुशांत धुत्तरगावकर, महिला आघाडीच्या जिल्हाध्यक्षा अस्मिता गायकवाड, उपशहरप्रमुख प्रताप चव्हाण, नगरसेवक प्रथमेश कोठे, विनायक कोंड्याल, विठ्ठल कोटा, राजकुमार हंचाटे, भारतसिंह बडूरवाले, संजय देशमुख, विष्णू कारमपुरी आदी उपस्थित होते. दरम्यान, माजी सेना, माजी सेवा या टॅग लाइनखाली शिवसेना पदाधिकाऱ्यांनी राबविलेल्या सामाजिक उपक्रमांचे फोटो सोशल मीडियावर अपलोड करावेत. जेणेकरून शिवभोजनासह अन्य उपक्रमांची माहिती सर्वसामान्यांपर्यंत पोचण्यास मदत होईल. शिवसेनाप्रमुख बाळासाहेब ठाकरे यांच्या स्मारकासाठी आठ ते दहा कोटींचा निधी महापालिकेच्या माध्यमातून शासनाकडून मागणी करण्याचा निर्णय या बैठकीत झाला, असे नगरसेवक धुत्तरगावकर यांनी सांगितले. 

हेही नक्‍की वाचा : स्पर्धा परीक्षा उत्तीर्ण विद्यार्थ्यांसाठी खुशखबर...का ते नक्‍की वाचा! 

स्मारकाच्या कामासाठी शंकर चौगुले यांची तयारी 
महापालिकेने शिवसेनाप्रमुख बाळासाहेब ठाकरे यांच्या स्मारकासाठी सुमारे पाच कोटींच्या भांडवली निधीची तरतूद अर्थसंकल्पामध्ये केली आहे. स्मारकाच्या कामासाठी महापालिकेने तीनवेळा निविदा काढली परंतु, मक्‍तेदारांनी त्याकडे पाठ फिरवली. केलेल्या कामांची बिले महापालिकेकडून तीन-चार वर्षांनंतरही मिळत नसल्याने मक्‍तेदारांनी निविदाच भरली नाही. या पार्श्‍वभूमीवर शंकर चौगुले यांनी स्मारकाच्या कामाची तयारी दर्शविली. शिवसेनेच्या बैठकीत त्यांचे अभिनंदन करण्यात आले. 

हेही नक्‍की वाचा : बारावीच्या परीक्षांवर बहिष्कार : गुरुवारी परीक्षा मंडळावर मोर्चा 

काम करा अन्यथा पदाधिकाऱ्यांमध्ये बदल : बरडे 
शिवसेना पक्षप्रमुख उद्धव ठाकरे राज्याचे मुख्यमंत्री असून आगामी काळात शिवसेनेचे संघटन मजबूत व्हावे, शासकीय योजना सर्वसामान्यांपर्यंत पोचाव्यात यादृष्टीने पदाधिकाऱ्यांनी काम करावे. जिल्ह्याचे सर्व पदाधिकारी तालुकास्तरीय दौरा करून लोकांचे प्रश्‍न जाणून घेतील. चांगले काम करणाऱ्यांना प्रोत्साहन दिले जाईल, मात्र काम न करणाऱ्या पदाधिकाऱ्यांना पदावरून काढून टाकले जाईल, असा इशारा जिल्हाप्रमुख पुरुषोत्तम बरडे यांनी दिला. या पुढे शिवसेना पक्षप्रमुख हा एकमेव गट राहील, असेही त्यांनी या वेळी स्पष्ट केले.