दमदार पावसाने भाटघर, वीर व नीरा देवघर धरणाच्या पाणी साठ्यात वाढ 

लवंग(सोलापूर)ः भाटघर, वीर, नीरा देवघर धरणांच्या लाभक्षेत्रात येणाऱ्या नीरा उजवा कालव्यावरील सोलापूर जिल्ह्यातील सांगोला, पंढरपूर, माळशिरस आणि सातारा जिल्ह्यातील फलटण या तालुक्‍यांमध्ये पडत असलेल्या दमदार पावसामुळे सिंचनासाठी कालव्याचे पाणी बंद करून तलाव भरले जात आहेत. या तालुक्‍यात परतीचा पाऊस पडत असतो परंतु यंदा मेच्या शेवटच्या आठवड्यापासूनच पावसाने हजेरी लावल्याने धरणाच्या पाणी साठयात वाढ होऊ लागली आहे. 

हेही वाचाः अक्कलकोटमध्ये दमदार पावसाची हजेरी 

मागील वर्षी धरणे भरल्यामुळे यंदाचा उन्हाळा जाणवलाच नाही. या वर्षी जून महिन्यात आणि आज 11 जुलै पर्यंत पावसाने धडाकेबाज हजेरी लावलेली आहे. तालुक्‍यात एक जून पासून 11 जुलैपर्यंत 14 इंच ते काही भागात 15 इंचाचा टप्पा गाठला. गतवर्षी याच कालावधीत फक्त दीड ते दोन इंचच पाऊस झाला होता. गतवर्षी लाभक्षेत्रात उशिरा पाऊस चालू झाला असला तरी धरणांवर लवकर पाऊस चालू झाल्याने धरणाच्या पाणीसाठ्यात झपाट्याने वाढ होत गेली होती. 

हेही वाचाः जिल्ह्यातील बॅंकामध्ये नव्वद टक्के कर्जदार ग्राहकांकडून कर्ज हफ्ता भरणा सुरू 

यंदा धरणावर कमी पाऊस आहे परंतु लाभक्षेत्रात मात्र चांगला पाऊस पडत असल्यामुळे शेतकरी समाधान व्यक्त करत आहेत. 
नीरा उजवा कालव्यातून पाणी चालू आहे. परंतु पिकांचे सिंचनाचे पाणी बंद करून ते आता माळशिरस तालुक्‍यातील निमगाव, उघडेवाडी, फोंडशिरस, गिरझणी तलावात पाणी सोडले जात असल्याने उघडेवाडी व गिरझणी तलाव भरले आहेत. पंढरपूर तालुक्‍यातील मोठे असणारा तिसंगी तलाव यामध्येही पाण्याचा साठा होण्यास सुरवात झाली आहे. 

सत्तांतर होताच पाणी वाटपातील नियमात बदल 
वीर, भाटघर आणि देवघर धरणांच्या पाणीसाठ्यातून नीरा उजवा कालवा आणि नीरा डावा कालवा यांना प्रकल्प अहवालानुसार जे पाणी वाटप केले गेले होते त्यामध्ये नीरा डावा कालव्याला कॉंग्रेस, राष्ट्रवादीची सत्ता असताना उजव्या कालव्याला वाटपाचे आलेल्या हिश्‍यातून पाणी घेतले होते. भाजप सरकारच्या निदर्शनास ही बाब आल्यानंतर त्यांनी नीरा उजवा कालव्याला परत पाणी वाढवून दिले. दरम्यान राष्ट्रवादी, कॉंग्रेस, शिवसेनेचे महाविकास आघाडीचे सरकार आल्यानंतर त्यांनी पुन्हा उजवा कालव्याला दिलेले पाणी डाव्या कालव्याला वळवल्याने राज्यात मोठी चर्चा रंगली होती. मात्र या राजकारणाचा उजव्या कालव्यावरील शेतकऱ्यांना उन्हाळ्यात ज्यावेळी पाणी कमी पडेल त्या वेळेस फटका बसणार आहे. 

धरणातील झालेला पाणी साठा 
भाटघर- 30.12 टक्के 
वीर - 38.69 टक्के 
नीरा-देवघर- 14.39 टक्के 

संपादनः प्रकाश सनपूरकर