व्होळे येथे अवैध वाळू उपशाविरोधात मोठी कारवाई; 70 ब्रास वाळूसह जप्त केला लाखो रुपयांचा मुद्देमाल 

पंढरपूर (सोलापूर) ः व्होळे (ता. पंढरपूर) येथे आज अवैध वाळू उपसा आणि वाहतुकीविरोधात धाडसी कारवाई करण्यात आली. या कारवाई दरम्यान 70 ब्रास वाळूसह लाखो रुपयांचा मुद्देमाल जप्त करण्यात आला आहे. प्रांताधिकारी सचिन ढोले यांच्या पथकाने ही कारवाई केली आहे. मागील काही महिन्यांतील ही सर्वांत मोठी कारवाई असल्याचे मानले जाते. दरम्यान, अवैध वाळू उपसा आणि वाहतूक कोणाच्या आश्रयाने सुरू होती, याची देखील चौकशी करावी, अशी मागणी केली जात आहे. 

हेही वाचा : कोरोना रुग्णांसाठी खुषखबर! महात्मा जनआरोग्य योजनेला मिळणार "या' महिन्यापर्यंत मुदतवाढ 

मागील काही दिवसांपासून पंढरपूर तालुक्‍यातील भीमा नदीकाठच्या अनेक गावांत वाळू माफियांनी धुमाकूळ घातला होता. दिवसाढवळ्या अवैध वाळू चोरी सुरू असल्याच्या तक्रारी वाढल्या आहेत. तक्रारींची दखल घेऊन येथील प्रांताधिकारी श्री. ढोले यांच्या मार्गदर्शनाखाली वाळू चोरी विरोधी पथकाने व्होळे व परिसरात मोठी कारवाई केली. कारवाई दरम्यान एक जेसीबी, तीन टिप्परसह लाखो रुपयांची 70 ब्रास वाळू जप्त केली आहे. या प्रकरणी आठ वाळू चोरांविरोधात कारवाई करण्यात आली आहे. 

हेही वाचा : सोलापूर शहरात कोरोनाचा हल्ला कर्त्या व्यक्तींवरच 

तालुक्‍यातील व्होळे, कौठाळी, शिरढोण, शेगाव दुमाला, मुंढेवाडी, अजनसोंड, सुस्ते या भागात मोठ्या प्रमाणावर वाळू चोरी सुरू आहे. पंढरपूर शहरातील चंद्रभागा नदी पात्रातून देखील मोठ्या प्रमाणावर वाळू चोरी सुरू आहे. वाळू चोरी विरोधात अनेक सामाजिक संघटनांनी प्रांताधिकारी श्री. ढोले यांच्याकडे तक्रारी केल्या होत्या. तक्रारींची दखल घेऊन प्रांताधिकाऱ्यांनी आज विविध भागातील अवैध वाळू साठ्यांवर कारवाई केली आहे. अन्य भागात देखील वाळू विरोधी पथकाने उशिरापर्यंत कारवाई केली. मंडल अधिकारी एस. ए. मुजावर, तलाठी राजेंद्र वाघमारे, दीपक शिंदे, समाधान शिंदे यांनी ही कारवाई केली. 

या कारवाईबाबत प्रांताधिकारी सचिन ढोले म्हणाले, आज दुपारी व्होळे व परिसरात अवैध वाळू उपसा आणि वाहतुकीविरोधात कारवाई केली आहे. कारवाई दरम्यान एक जेसीबी, तीन टिप्पर आणि 70 ब्रास वाळू जप्त करण्यात आली आहे. रात्री उशिरापर्यंत ही कारवाई सुरू राहणार आहे. तालुक्‍यातील अन्य भागात देखील अशीच कारवाई केली जाणार आहे. 

संपादन : श्रीनिवास दुध्याल