"या' तालुक्‍यात सापडले नव्याने तीन कोरोना पॉझिटिव्ह रुग्ण; एकूण रुग्णसंख्या झाली सहा 

मंगळवेढा (सोलापूर) : तालुक्‍यामध्ये नव्याने तीन रुग्ण वाढले असून, शहरामध्ये एका 35 वर्षीय महिलेचा व बोराळे येथील दोघांचा रिपोर्ट पॉझिटिव्ह आल्यामुळे तालुक्‍यातील रुग्णांची संख्या आता सहा झाली आहे. कोरोनाच्या प्रतिबंधासाठी प्रशासकीय यंत्रणा सतर्क झाली. तालुक्‍याच्या सीमा बंद केल्या. 

हेही वाचा : सोलापूरसह शेजारच्या गावांमध्ये गुरुवारपासून कडक लॉकडाउन 

शहरातील पॉझिटिव्ह रुग्णांच्या संपर्कातील लोकांना क्वारंटाइन करण्यात आले आहे, तर दोन दिवसांपूर्वी बोराळे येथील रुग्ण बॅंक कामासाठी सोलापूरला गेल्यानंतर तो कोरोना पॉझिटिव्ह रुग्णाच्या संपर्कात आल्यामुळे त्याचा अहवाल पॉझिटिव्ह आला. त्याच्या संपर्कात असलेल्या चौघांपैकी दोघांचे रिपोर्ट पॉझिटिव्ह आले असून, दोघांचे रिपोर्ट निगेटिव्ह आले. तर आज नव्याने नागणेवाडीतील महिला इचलकरंजी येथे जाऊन मंगळवेढ्यामध्ये परत आल्यानंतर तिला त्रास होऊ लागल्याने मंगळवेढ्यात उपचार घेऊन पुढील उपचारासाठी सोलापूरला पाठवण्यात आल्यानंतर तिचा अहवालही पॉझिटिव्ह आला. यामुळे तिच्या संपर्कात असलेल्या व्यक्तींचा शोध घेण्याचे काम प्रशासनाने सुरू केले आहे. 

हेही वाचा : सोलापुरात कोरोनाचा उच्चांक! ग्रामीणमध्ये 107 तर शहरात 86 रुग्ण; पेंडिंग 290 रिपोर्टने वाढविली चिंता 

दरम्यान, सध्या शहराच्या सीमा प्रशासनाने सील केल्या असून, अत्यावश्‍यक सेवा वगळता इतर सर्व सुविधा बंद करण्यात आल्या आहेत. पोलिसांनी देखील शहरामध्ये कारवाई मोहीम आणखी तीव्र करत दंडाची वसुली सुरू केली आहे. ग्रामीण भागातील बहुतांश ग्रामपंचायतींनी बिगर मास्क फिरणाऱ्या नागरिकांवर कारवाईची मोहीम सुरू करून दंडाची रक्कम आकारण्यास सुरवात केली आहे. 

संपादन : श्रीनिवास दुध्याल