काम कसे करु... राजीनामाच घ्या...

मोहोळ (जि. सोलापूर) ः मोहोळ ग्रामीण रुग्णालयात रुग्णवाहिका नाही. चालकाचे पद गेल्या अनेक वर्षापासून रिक्त आहे. कोरोनाच्या पार्श्वभूमीवर रुग्णांची भर पडत आहे. तालुक्‍यासह बाहेरील राज्यातील रुग्ण याठिकाणी येतात. रात्री अपरात्री रुग्ण आले तर त्यांना विलगीकरण कक्षात पाठवायची व्यवस्था कशी करणार? रुग्णाना सोयी सुविधा मिळत नसतील तर काम कसे करायचे या नैराश्‍यातून मी राजीनामा दिला असल्याची माहिती मोहोळ येथील ग्रामीण रुग्णालयातील वैद्यकीय अधिक्षक डॉ. पी. पी. गायकवाड यांनी दिली. 

हेही वाचा ः समुपदेशन करणाऱया परिचारिका व तिच्या पतीच्या गाड्या जाळल्या

दरम्यान राजीनामा दिल्यानंतर जिल्हा शल्य चिकित्सक डॉ. प्रदीप ढेले यांनी तुम्हाला तातडीने रुग्णवाहिका उपलब्ध करून देतो, असे आश्वासन दिल्याची माहितीही डॉ. गायकवाड यांनी दिली. 

हेही वाचा ः लाॅकडाऊन... कचरा संकलनात घट

मोहोळ येथील ग्रामीण रुग्णालयातील वैद्यकीय अधीक्षक हे पद गेल्या अनेक दिवसापासून रिक्त आहे. सध्या प्रभारी म्हणून डॉ. गायकवाड काम पाहत आहेत. सध्या कोरोनासारख्या आजाराचे उच्चाटनासाठी काम करीत असताना प्रशासनाचे कुठलेही सहकार्य मिळत नाही. वेळोवेळी मागणी करूनही पूर्तता होत नाही. त्यापेक्षा राजीनामा देणेच योग्य या भावनेतून मी राजीनामा दिला असल्याचे डॉ. गायकवाड यांनी सांगितले. राजीनामा देताच एकच खळबळ उडाली आहे. नजीक पिंपरी (ता. मोहोळ) येथील विलगीकरण कक्षात ठेवलेले रुग्ण निघून जाण्याच्या मानसिकतेत आहेत. त्याठिकाणी प्राथमिक आरोग्य केंद्रातील कर्मचारी नेमावेत, अशीही मागणी गायकवाड यांनी वरिष्ठाकडे केली होती. महाराष्ट्र

हेही वाचा ः ...या समस्येला सामोरे जाण्यास प्रशासन सज्ज

ग्रामीण रुग्णालयात अनेक महत्वाची पदे रिक्त आहेत. वारंवार मागणी करूनही ती शासनाकडुन भरली जात नाहीत, संशयित म्हणून येणाऱ्यांची संख्या मोठ्या प्रमाणात वाढली आहे. आजपर्यंत सोळाशे नागरिकांची तपासणी केल्याचे डॉ. गायकवाड यांनी सांगितले. 

राजीनामा दिला रुग्णसेवा सुरूच 
मी कामासाठीच आहे. काम करायचे म्हणून तरी प्रशासनात आलो आहे, पण रुग्णासाठी जर सोयी सुवीधा मिळत नसतील तर काम कसे करणार? राजीनामा दिला असला तरी रुग्णसेवा सुरू आहे. 
डॉ. पी. पी. गायकवाड, प्रभारी वैद्यकीय अधिक्षक मोहोळ .