प्राचार्य डॉ. महेंद्र कदम यांच्या "तणस' कादंबरीला रेंदाळकर पुरस्कार जाहीर 

संतोष पाटील 
Monday, 7 September 2020

प्राचार्य डॉ. महेंद्र कदम यांची "धूळपावलं' आणि "आगळ' या कादंबऱ्यांनंतर "तणस' ही त्यांची तिसरी कादंबरी प्रकाशित झाली आहे. आजच्या संभ्रमित पिढीच्या वर्तमानकाळाला कवेत घेणारी ही कादंबरी म्हणजे अपेक्षाभंगाची भळभळती जखम घेऊन वावरणाऱ्या पिढीची कथा आहे. समाजातल्या विविध स्तरांमधील तरुण संघर्ष करताना यात पाहायला मिळतात. "तणस'च्या रूपाने "वाहनतळ' मराठी कादंबरीत पहिल्यांदाच अवतीर्ण झाला आहे. 

टेंभुर्णी (सोलापूर) : कोल्हापूर जिल्ह्यातील रेंदाळ (ता. हातकणंगले) येथील कविवर्य ए. पां. रेंदाळकर वाचनालयाच्या वतीने उत्कृष्ट कादंबरीसाठी दिला जाणारा कविवर्य रेंदाळकर पुरस्कार येथील कादंबरीकार प्राचार्य डॉ. महेंद्र कदम यांच्या "तणस' कादंबरीला जाहीर झाला आहे. वाचनालयाचे अध्यक्ष आर. एम. पाटील यांनी पुरस्काराची घोषणा केली. 

हेही वाचा : "उजनी' तुडूंब भरूनही मासे सापडण्याचे प्रमाण कमी : दरही झाले कमी 

टेंभुर्णी येथील विठ्ठलराव शिंदे कला महाविद्यालयाचे प्राचार्य डॉ. महेंद्र कदम यांची "धूळपावलं' आणि "आगळ' या कादंबऱ्यांनंतर "तणस' ही त्यांची तिसरी कादंबरी प्रकाशित झाली आहे. आजच्या संभ्रमित पिढीच्या वर्तमानकाळाला कवेत घेणारी ही कादंबरी म्हणजे अपेक्षाभंगाची भळभळती जखम घेऊन वावरणाऱ्या पिढीची कथा आहे. समाजातल्या विविध स्तरांमधील तरुण संघर्ष करताना यात पाहायला मिळतात. "तणस'च्या रूपाने "वाहनतळ' मराठी कादंबरीत पहिल्यांदाच अवतीर्ण झाला आहे. जिवंत आणि प्रत्ययकारी चित्रणातून "तणस'च्या रूपाने प्रगल्भ आणि वेगळी अनुभूती वाचकांना येते. 

हेही वाचा : बारावीत इंग्रजीमध्ये फक्त 35 मार्क, पण आता इंग्रजीमध्येच डॉक्‍टरेट ! शिरनादंगीतील युवकाचा प्रेरणादायी प्रवास 

कोल्हापूर जिल्ह्यातील रेंदाळ येथील कविवर्य ए. पां. रेंदाळकर वाचनालयाच्या वतीने ज्येष्ठ आणि उल्लेखनीय लेखकांना त्यांच्या साहित्यिक योगदानाबद्दल सन्मानित करण्यात येते. रोख रक्कम, सन्मानचिन्ह असे या पुरस्काराचे स्वरूप आहे. या पुरस्कार निवड समितीसाठी डॉ. रणधीर शिंदे, डॉ. गिरीश मोरे आणि डॉ. रफीक सूरज यांनी काम पाहिले. 

प्राचार्य डॉ. महेंद्र कदम यांना यापूर्वी महाराष्ट्र शासनाचा दादोबा पांडुरंग पुरस्कार, सोलापूरचा भैरू रतन दमाणी आणि मनोरमा पुरस्कार, कोपरगाव येथील भि. ग. रोहमारे, वर्धा येथील बाबा पद्मनजी पुरस्कार, कोल्हापूरचा अण्णाभाऊ साठे पुरस्कार, पुण्याचा आदर्श शिक्षक पुरस्कार आदी 17 पुरस्कारांनी सन्मानित करण्यात आले आहे. प्राचार्य डॉ. महेंद्र कदम यांना हा पुरस्कार जाहीर झाल्याबद्दल आमदार बबनराव शिंदे, आमदार संजय शिंदे, जिल्हा परिषद सदस्य रणजितसिंह शिंदे, पंचायत समिती सभापती विक्रमसिंह शिंदे, विठ्ठलराव शिंदे कला महाविद्यालयातील सर्व प्राध्यापक आणि प्रशासकीय कर्मचाऱ्यांनी त्यांचे अभिनंदन केले. 

संपादन : श्रीनिवास दुध्याल


स्पष्ट, नेमक्या आणि विश्वासार्ह बातम्या वाचण्यासाठी 'सकाळ'चे मोबाईल अॅप डाऊनलोड करा
Web Title: Rendalkar Award announced for Principal Dr. Mahendra Kadams novel Tanas