रविवारपासून आठ दिवस माढयात कडक जनता कर्फ्यू 

माढा(सोलापूर): माढा नगरपंचायत पदाधिकाऱ्यांसमवेत व्यापाऱ्यांच्या झालेल्या बैठकीत उत्फूर्तपणे रविवारपासून (ता. 19) आठ दिवस माढयात जनता कर्फ्यू पुकारण्यात आला आहे. 
माढा तालुक्‍यातील काही गावांत कोरोनाचे रूग्ण आढळून आले आहेत. त्यामुळे हा निर्णय घेण्यात आला आहे. 

हेही वाचाः धक्कादायकः या तालूक्‍याच्या सबजेलमधील 28 कैद्यांसह दिवसभरात 34 कोरोना पॉझिटिव्ह रुग्ण आढळल्याने खळबळ 

या पार्श्वभूमीवर माढयात कोरोनाचा शिरकाव होऊ नये म्हणून माढा नगरपंचायतीच्या सहकारमहर्षी गणपतराव साठे सभागृहात नगरपंचायत पदाधिकारी, अधिकारी, व्यापारी यांची बैठक झाली. याबाबत नगरपंचयातीने केलेल्या आवाहनाला सर्वांनी उस्फुर्त प्रतिसाद दिला. कोरोना विषाणूचा वाढता धोका लक्षात घेता शहराच्या सुरक्षेच्या दृष्टीने हा जनता कर्फ्यू पुकारण्यात आला आहे. 

हेही वाचाः ऑनलाइन व थेट विक्रीअभावी भाजीपाला उत्पादकांना बसतोय लाखोंचा फटका 

रविवारी (ता. 19) ते रविवारी (ता. 26) असे आठ दिवस जनता कर्फ्यू पुकारण्यात आला आहे. अत्यावश्‍यक सेवांमध्ये दुध व पाणी सकाळी सात ते नऊ आणि रात्री सात ते नऊ या वेळेत नागरिकांना उपलब्ध करून घेता येईल. कृषी सेवा केंद्रे सकाळी नऊ ते बारापर्यंत सुरू राहणार आहेत. दवाखाने व मेडिकल दुकाने चोवीस तास सुरू ठेवण्याचा निर्णय घेतला आहे. या साठी नगराध्यक्षा ऍड. मीनल साठे, संत कुर्मदास कारखान्याचे संचालक दादासाहेब साठे, मुख्याधिकारी डॉ, चरण कोल्हे, सहाय्यक पोलीस निरीक्षक अमुल कादबाने, माजी नगराध्यक्ष राहुल लंकेश्वर, गंगाराम पवार, प्रभाकर जाधव, सभापती कल्पना जगदाळे, नगरसेविका सुप्रिया बंडगर व व्यापाऱ्यांनी सहकार्य केले आहे.  
 

संपादनः प्रकाश सनपूरकर