धक्कादायक : "या' तालुक्‍याच्या सबजेलमधील 28 कैद्यांसह दिवसभरात 34 कोरोना पॉझिटिव्ह रुग्ण आढळल्याने खळबळ 

मंगळवेढा (सोलापूर) : मंगळवेढा येथील सबजेल 40 मधील 28 कैद्यांचे अहवाल रॅपिड अँटिजेन चाचणीत पॉझिटिव्ह आले. कैद्यांबरोबरच एक पोलिस अधिकारी, दोन सुरक्षारक्षक व एका डबेवालासह दिवसभरात 34 रुग्ण आढळून आले. 

हेही वाचा : धक्कादायक ! "त्या' कर्जबाजारी हॉटेल व्यावसायिकाला सावकारांनी दिली होती मुलांना पळवून देण्याची धमकी 

याबाबतचा अहवाल काल (शुक्रवारी) रात्री उशिरा देण्यात आला. तालुक्‍यात कैद्यांचा अहवाल पॉझिटिव्ह आल्यामुळे नागरिकांमध्ये चिंतेचे वातावरण असले तरी, प्रशासनाने योग्य ती खबरदारी घेतल्याचे सांगण्यात आले. संस्थात्मक विलगीकरण केलेल्यांमधील सलगर बुद्रूक प्राथमिक आरोग्य केंद्रातील दोन कर्मचारी पॉझिटिव्ह आढळून आले तर नंदूर येथील रुग्णाशी संबंधित असलेल्याची रॅपिड ऍटिजेन टेस्ट निगेटिव्ह आली. सबजेल मधील 12 कैद्यांची चाचणी निगेटिव्ह आल्यामुळे त्यांना तात्पुरत्या स्वरूपात नवीन तहसील कार्यालयातील जेलमध्ये स्थलांतर करण्यात आले आहे. सलगर बुद्रूक प्राथमिक आरोग्य केंद्रातील वैद्यकीय अधिकारी पॉझिटिव्ह आढळून आल्यामुळे संबंधित असलेल्या 41 कर्मचाऱ्यांची रॅपिड टेस्ट घेण्यात आली. त्यामध्ये 39 रिपोर्ट हे निगेटिव्ह आले, तर दोन रिपोर्ट पॉझिटिव्ह आले. यापूर्वी रुग्णाशी संबंधित कर्मचाऱ्यांना संस्थात्मक विलगीकरण करण्यात आले होते व 305 लोकांना होम क्वारंटाईन करण्यात आले. 

हेही वाचा : राज्यात खरिपाची 82.98 टक्के पेरणी; पुणे विभागात 100 टक्‍क्‍यांपेक्षा अधिक पेरा... जाणून घ्या सविस्तर... 

वैद्यकीय अधिकाऱ्यांच्या संपर्कात आलेल्यांमधील एक परिचारिका व लिपिक या दोघांचे रिपोर्ट पॉझिटिव्ह आले तर नंदूर येथे 5 जुलै रोजी आलेल्या रुग्णाला त्रास होऊ लागल्यामुळे त्याला सोलापूरच्या शासकीय रुग्णालयात दाखल करण्यात आले. त्याचा सारीचा अहवाल पॉझिटिव्ह आला. त्या रुग्णाच्या संबंधित हाय रिस्कमधील 22 नागरिकांची रॅपिड ऍटिजेन टेस्ट घेण्यात आली. त्यामध्ये त्यांचे रिपोर्ट निगेटिव्ह आले. त्यामुळे तालुक्‍यात दोन नव्याने रुग्ण वाढले आहेत. ते संस्थापक विलगीकरण कक्षात आहेत. नंदूरच्या रुग्णातील संपर्कातील नागरिकांचे सर्वेक्षण करण्याचे काम आरोग्य विभागाकडून सुरू असून. आवश्‍यक त्या उपाययोजना करण्याच्या दृष्टीने प्रशासन सज्ज असल्याची माहिती उपविभागीय अधिकारी उदयसिंह भोसले यांनी दिली. 

संपादन : श्रीनिवास दुध्याल