फडणवीसांच्या काळातील निधी ठाकरे सरकार वापरणार

सोलापूर : तत्कालीन मुख्यमंत्री देवेंद्र फडणवीस यांनी महाराष्ट्र राज्यातील शेतकऱ्यांना कर्जमाफी देण्यासाठी छत्रपती शिवाजी महाराज शेतकरी सन्मान योजना राबविली. राज्यात सत्तांतर झाल्यानंतर मुख्यमंत्री उद्धव ठाकरे यांनी महात्मा जोतिराव फुले कर्जमुक्ती योजना जाहीर केली आहे. योजना जाहीर केली, परंतु योजनेच्या अंमलबजावणीसाठी जिल्हास्तरावर निधी उपलब्ध नव्हता. जुन्या कर्जमाफीच्या योजनेतील निधी नव्या कर्जमुक्तीच्या योजनेसाठी खर्च करण्यास सहकार विभागाने मान्यता दिली आहे.

हे ही वाचा... शक्तीमान बाबतचे हे गुपित तुम्हाला माहिती आहे का?

दोन लाखांपर्यंत कर्ज असलेल्या शेतकऱ्यांना कर्जमुक्ती देण्याचा निर्णय राज्य सरकारने घेतला आहे. या योजनेचे काम सध्या युद्धपातळीवर सुरू आहे. योजनेच्या अंमलबजावणीसाठी अधिकारी व कर्मचाऱ्यांना प्रशिक्षण देणे, मेळावे घेणे, योजनेला व्यापक प्रसिद्धी देणे, कंत्राटी मनुष्यबळ, आपलं सरकार केंद्राला निधी देणे यासाठी निधी आणायचा कोठून? हा प्रश्‍न पडला होता. जिल्हास्तरावर कर्जमुक्ती योजनेला निधी देण्यासाठी जुन्या कर्जमाफीच्या योजनेतील शिल्लक 4.5 कोटी रुपये निधी शिल्लक होता. त्यातील एक कोटी 70 लाख रुपये नव्या कर्जमाफीच्या योजनेसाठी खर्च केले जाणार आहेत.

हे ही वाचा... वळसे पाटील म्हणाले पुण्यापेक्षा सोलापूरचा आराखडा चांगला

मुंबई वगळून राज्यातील सर्व जिल्ह्यांना प्रत्येकी पाच लाख रुपयांचा निधी दिला जाणार आहे. जिल्हास्तरावर हा निधी खर्च करण्याचे अधिकार जिल्हाधिकाऱ्यांना देण्यात आले असून येत्या काळात प्रसिद्धी, मेळावे, प्रशिक्षण हा खर्च या निधीतून भागविला जाणार आहे. सहकार, महसूल, कृषी विभाग सध्या कर्जमुक्ती योजनेत मिशन मोडवर कामाला लागले आहे. शेतकऱ्यांची माहिती तपासून पूर्ण झाली आहे. फेब्रुवारीपासून पोर्टलवर ही माहिती अपलोड केली जाणार आहे. मार्चमध्ये या योजनेचा प्रत्यक्ष लाभ शेतकऱ्यांना मिळेल अशी शक्‍यता आहे. 

दुसऱ्या व तिसऱ्या टप्प्याबद्दल उत्सुकता 
दोन लाखांपेक्षा जास्त कर्ज असलेल्या शेतकऱ्यांना सरकार कशापद्धतीने दिलासा देईल. जे शेतकरी नियमित कर्जफेड करतात, त्या शेतकऱ्यांना सरकार प्रोत्साहन म्हणून किती रक्कम देणार? याकडे शेतकऱ्यांचे लक्ष लागले आहे. कर्जमुक्ती योजनेतील दुसरा व तिसरा टप्पा अद्यापही जाहीर झालेला नाही.