वळसे पाटलांचे सोलापूर जिल्ह्यात जंगी स्वागत 

सोलापूर : राज्याचे कामगारमंत्री तथा सोलापूरचे पालकमंत्री दिलीप वळसे-पाटील शुक्रवारी रात्री पंढरपूरला मुक्कामी आले होते. पंढरपूरनंतर ते आज सकाळी मोहोळमार्गे सोलापूरला आले. पालकमंत्री झाल्यानंतर वळसे-पाटील पहिल्यांदाच सोलापूरला आल्याने सोलापूर, मोहोळ, पंढरपूर या ठिकाणी त्यांचे जंगी स्वागत करण्यात आले. 
हेही वाचा - खंडणी मागणारा धाडसचा अध्यक्ष पोलिसांच्या जाळ्यात 
मोहोळमध्ये माजी आमदार राजन पाटील, आमदार यशवंत माने, जिल्हा परिषद सदस्य विक्रांत पाटील, राष्ट्रवादी विद्यार्थी कॉंग्रेसचे प्रदेशाध्यक्ष अजिंक्‍यराणा पाटील यांच्यासह पदाधिकारी व कार्यकर्त्यांच्या उपस्थितीत स्वागत करण्यात आले. सोलापूर शहरात आगमन झाल्यानंतर शहराध्यक्ष भारत जाधव, कार्याध्यक्ष संतोष पवार यांनी स्वागत केले. वळसे-पाटील सोलापुरात आल्यानंतर शासकीय विश्रामगृहात दाखल झाले. सोलापुरात त्यांना भेटण्यासाठी राष्ट्रवादीचे पदाधिकारी व कार्यकर्ते. सर्वसामान्य नागरिकांनी मोठी गर्दी केली होती. 
हेही वाचा - परितेचा योगेश रक्ताच्या कर्करोगाशी लढतोय 
आज दुपारी सोलापुरातील शिवछत्रपती रंगभवन सभागृहात शहर व जिल्हा राष्ट्रवादीचा मेळावा होणार आहे. या मेळाव्यासाठी राष्ट्रवादीच्यावतीने वातावरण निर्मिती करण्यात आली आहे. वळसे पाटील यांच्या स्वागतासाठी जागोजागी कमानी उभारण्यात आल्या आहेत. वळसे-पाटील यांच्यासोबत या वेळी आमदार भारत भालके, जिल्हाध्यक्ष बळिराम साठे, प्रदेश उपाध्यक्ष दीपक साळुंखे, जिल्हा कार्यकारी अध्यक्ष उमेश पाटील, उत्तमराव जानकर आदी उपस्थित होते.