गुरुजींना पगार वेळेवर मिळेल का?

सोलापूर : लॉकडाउनच्या दिव्यातून मार्ग काढत गुरुजींचा मार्च महिन्याचा पगार अखेर एप्रिलच्या शेवटच्या दिवशी झाला. परंतु, त्यापूर्वी शासनाने एप्रिल महिन्याचा पगार वेळेत व 100 टक्के करण्याच्या सूचना दिल्या आहेत. परंतु, एप्रिलचा पगार करण्यासाठी निधी उपलब्ध करून दिलेला नाही. त्यामुळे एप्रिलचा पगार तरी वेळेवर होणार का, याबाबत प्रश्‍नचिन्ह आहे. 

हेही वाचा- सोलापुरात सापडले आणखीन दहा कोरोना बाधित, एकूण संख्या 124 

मार्चचा पगारासाठी संघटनांचे प्रयत्न 
कोरोनाच्या पार्श्‍वभूमीवर शासकीय कर्मचाऱ्यांचा पगार कपात करण्याचा निर्णय शासनाने घेतला होता. त्याप्रमाणे गुरुजींचा मार्च महिन्याचा पगार 25 टक्के इतका कपात करण्यात आला आहे. परंतु, एप्रिलचा पगार हा 100 टक्के द्यावा, अशा सूचना शासनाने दिल्या आहेत. मार्चचा पगार मिळविण्यासाठी गुरुजींना अनेक दिव्याला सामोरे जावे लागले. अनेक शिक्षक संघटनांनी यासाठी प्रयत्न केला. माध्यमिकच्या काही संघटनांमध्ये तर श्रेयासाठी सोशल वॉरही झाले. परंतु, शेवटी सगळ्यांच्या प्रयत्नाने का होईना मार्च महिन्याचा पगार एप्रिलच्या 29 व 30 तारखेला झाला. 

हेही वाचा- पुणे विभागात सांगोला तालुक्‍याची बाजी

एप्रिलच्या पगारासाठी पाठपुरावा सुरू 
आता शिक्षक संघटनांकडून एप्रिल महिन्याचा पगार वेळेवर होण्यासाठी पाठपुरावा सुरू केला आहे. शिक्षक आमदार दत्तात्रय सावंत यांनी तशा प्रकारचे पत्रही शासनाला दिले आहे. त्यासाठी आवश्‍यक असलेला निधी उपलब्ध करून देण्याबाबतचा उल्लेखही त्यांनी त्या पत्रामध्ये केला आहे. मात्र, एप्रिलचा पहिला आठवडा सुरू झाला असला तरी अद्यापही त्यासाठी निधी मात्र उपलब्ध झालेला नाही. निधी उपलब्ध झाल्यानंतर पगाराची पुढील प्रक्रिया सुरू करण्यात येईल, असे माध्यमिकच्या वेतन पथक कार्यालयाकडून सांगण्यात आले. त्यामुळे शासन आता या शिक्षकांच्या पगारासाठी निधी कधी उपलब्ध करून देणार, यावर त्यांचा एप्रिल महिन्याचा पगार कधी होणार, हे अवलंबून आहे.