55 वर्षीय महिलेवर अत्याचार; बेदम मारहाणीत आरोपीचा मृत्यू 

अकोले : तालुक्‍यातील आदिवासी दुर्गम भागातील एका गावाच्या शिवारात जनावरे चारण्यासाठी गेलेल्या 55 वर्षीय महिलेवर एकाने अत्याचार केला. त्यामुळे पीडित महिलेच्या संतप्त झालेल्या कुटुंबीयांनी आरोपीस पकडून, दगडी बाकाला बांधून बेदम चोप दिला. त्यात गंभीर जखमी झाल्याने आरोपीचा मृत्यू झाला. राजू गणपत सोनवणे (वय 45, रा. शिरपुंजे, ता. अकोले) असे या मृत आरोपीचे नाव आहे. याबाबत राजूर पोलिस ठाण्यात आरोपीविरुद्ध अत्याचाराचा, तर पीडित महिलेच्या कुटुंबीयांविरोधात खुनाचा गुन्हा दाखल करण्यात आला आहे. 

जाणून घ्या- कर्मचाऱ्यांची खेचाखेची; दमछाक भाविकांची

अत्याचाराबाबत पीडित महिलेने राजूर पोलिस ठाण्यात फिर्याद दिली. त्यानुसार, पीडित महिला मंगळवारी (ता. 4) दुपारी साडेबाराच्या सुमारास जायनावाडी गावाच्या शिवारातील खंडोबाच्या माळावर जनावरे चारण्यासाठी घेऊन गेली होती. त्या वेळी आरोपी राजू सोनवणे याने महिलेवरच अत्याचार केला, असे फिर्यादीत म्हटले आहे.

बाकाला बांधून आरोपीला बेदम मारहाण

दरम्यान, पीडित महिलेने हा प्रकार घरी आल्यावर कुटुंबीयांना सांगितला. त्यामुळे संतप्त झालेल्या कुटुंबीयांनी गावातील दगडी बाकाला बांधून आरोपीला बेदम मारहाण केली. मारहाणीत आरोपी गंभीर जखमी झाला होता. त्यानंतर त्यास राजूर पोलिस ठाण्यात आणले. तेथील तपासणीसाठी त्याला राजूर ग्रामीण रुग्णालयात नेण्यात आले. मात्र, प्रकृती गंभीर असल्याने त्याला नाशिकला हलविण्यात आले. मात्र, उपचारापूर्वीच त्याचा मृत्यू झाला. 

तिघांविरोधात खुनाचा गुन्हा

याबाबत गावातील पोलिस पाटलांनी राजूर पोलिस ठाण्यात फिर्याद दिली. त्यानुसार महिलेवरील अत्याचाराच्या रागातून तिच्या कुटुंबीयांनी मंगळवारी (ता. 4) दुपारी 2 ते 4 वाजेदरम्यान राजू सोनवणे यास बेदम मारहाण केली. त्यात त्याचा मृत्यू झाला, असे फिर्यादीत म्हटले आहे. त्यावरून राजूर पोलिसांनी पीडित महिलेच्या कुटुंबातील तिघांविरोधात खुनाचा गुन्हा दाखल केला. सर्व आरोपींना अटक केली. पुढील तपास सहायक पोलिस निरीक्षक नितीन पाटील करीत आहेत.

हेही वाचा- नाही खर्चिली कवडी दमडी

घटनेने खळबळ

दरम्यान, आदिवासी दुर्गम भागातील महिलेवर अत्याचार, तसेच अत्याचार करणाऱ्याचा खून, अशी घटना घडल्याने खळबळ उडाली आहे. अतिरिक्त पोलिस अधीक्षक दीपाली काळे यांनी घटनास्थळाला भेट दिली.