खुशखबर.. या शहरात थकबाकीदारांना दंडात 75 टक्के सवलत 

सोलापूर ः स्मार्ट सिटी योजनेत पहिल्या यादीत समावेश झालेल्या सोलापूर शहरातील तब्बल 50 हजार थकबाकीदारांना त्यांना झालेल्या दंडामध्ये 75 टक्क्यांची सवलत मिळणार आहे. या संदर्भातील आदेश आयुक्त दीपक तावरे यांनी गुरुवारी जारी केले. मिळकत कराची थकबाकी असेल तर दरमहा दोन टक्के दंड लावण्याची तरतूद राज्य शासनाने केली आहे.

हेही वाचा - उद्धव साहेब या खेकड्यांच्या नांग्या वेळीच ठेचा

दंडाची रक्कम 58 कोटी रुपये
सोलापूर शहरातील गावठाण भागात 93 हजार 822 मिळकतदार आहेत. त्यापैकी 43 हजार 228 मिळकतदारांनी नियमित बिल भरले आहे. तर 50 हजार 594 मिळकतदारांना दोन टक्के दंड झाला आहे. ही थकबाकी 58 कोटी 94 लाख 72 हजार 183 इतकी आहे. या रकमपैकी 75 टक्के दंडाची रक्कम ही माफ केली जाणार आहे. मात्र त्यासाठी 29 फेब्रुवारीपर्यंत संबंधित मिळकतदाराने त्याच्याकडील सर्व थकबाकी एकवट भरणे आवश्यक आहे. 

हेही वाचा - माहिती आहे का, मिडल ईस्टला जाताहेत सोलापूरचे मासे 

नोटीस व वॅारंट फी पूर्णपणे माफ
दंडाच्या रकमेत 75 टक्के माफ करण्याबरोबरच नोटीस व वॅारंट फीही पूर्णपणे माफ केली जाणार आहे. शहर व हद्दवाढ भागातील मिळकतदारांकडे 3.81 कोटींची वॅारंट फी आणि 1.72 कोटींची नोटीस फी थकीत आहे. ही सर्व माफ होणार आहे. 

हद्दवाढीतील मिळकतदारांना 42 कोटींचा दंड
हद्दवाढ भागातील मिळकतदारांना आतापर्यंत 42 कोटींचा दंड झाला आहे. त्यापैकी 75 टक्के रक्कम आता माफ होणार आहे. शहर व हद्दवाढ मिळून एकूण दंडाची रक्कम
सुमारे 100 कोटींची थकबाकी आहे. त्यापैकी जवळपास 75 कोटींचा दंड माफ होण्याची शक्यता आहे.