कामटेसह साथीदारांनी कट रचून केला खून 

कामटेसह साथीदारांनी कट रचून केला खून 

सांगली -  बडतर्फ पोलिस उपनिरीक्षक युवराज कामटेसह साथीदारांनी अनिकेत कोथळे याचा कट रचून केल्याचा  युक्तीवाद विशेष सरकारी वकील उज्ज्वल निकम यांनी ठामपणे न्यायालयासमोर केला. कामटेसह साथीदारांवर दहा आरोप ठेवावेत, अशी विनंतीही केली. त्यावर पुढील सुनावणीत आदेश होणार आहे. जिल्हा न्यायाधीश एस. एस. सापटणेकर यांच्यासमोर ही सुनावणी सुरू आहे. 

खटल्याची पार्श्‍वभूमी अशी, की कोथळे खून प्रकरणी कामटेसह अनिल लाड, अरुण टोणे, नसिरूद्दीन मुल्ला, राहुल शिंगटे, झिरो पोलिस झाकीर पट्टेवालेवर यांनी अनिकेत कोथळेचा खून केला. 16 ऑक्‍टोबर रोजी या सर्वांवर एकूण दहा आरोप प्रस्तावित करण्यात आले होते. त्यात कटानुसार अनिकेत आणि अमोल भंडारेला अटक केली. अनिकेतकडून अन्य गुन्हे जबरदस्तीने कबूल करून घेण्यासाठी बेदम मारहाण केली. त्यात त्याचा मृत्यू झाला. या गुन्ह्यात शिक्षा होणार असल्याचे माहीत असूनही कट रचून खोटी माहिती समोर आणली. त्यासह सर्वांनी संगनमत करून खून केला.

कटानुसार सात नोव्हेंबरला आंबोलीतील महादेवगड येथे अनिकेतचा मृतदेह जाळण्याचा प्रयत्न करणे, पुरावा नष्ट करणे, अनिकेतला मारहाण करून गंभीर दुखापती करणे, गुन्ह्याची माहिती वरिष्ठांपासून लपविणे, अनिकेत पळून गेल्याचा बनाव करणे, साक्षीदार अमोल भंडारेला मारहाण, अनिकेतचा शारीरिक छळ करून अपमान आदी आरोप प्रस्तावित केले होते. मुख्य साक्षीदार अमोल भंडारे याला पिस्तुलाचा धाक दाखवून दमदाटी केली, असेही आरोपात म्हटले आहे. त्यानुसार हे सारे आरोप आज अॅड. निकम यांनी न्यायालयासमोर ठेवले. त्यावर विरोधीपक्षाच्या वकिलांचे म्हणणे सादर होणार असून त्यानंतर पुढील सुनावणी यावर आदेश दिले जाणार आहेत.

दरम्यान, गेल्या पाच फेब्रुवारी रोजी राज्य गुन्हे अन्वेषण विभागाने दोषारोपत्र दाखल केले होता. एक वर्षानंतर त्याच दिवशी कामटेसह साथीदारांवर दहा आरोप न्यायालयासमोर ठेवण्यात आले होते. 

Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.

Related Stories

No stories found.
Marathi News Esakal
www.esakal.com