आटपाडी : एकापाठोपाठ एक उडणार निवडणुकांचे बार

आटपाडी : आटपाडी तालुक्यात यंदाची सुरवातच सोसायटीच्या निवडणुकांनी झाली असून विकास सेवा सोसायटी, जिल्हा परिषद, पंचायत समिती, कृषी उत्पन्न बाजार समिती ते आटपाडी नगरपंचायतीच्या निवडणुकीचा एकापाठोपाठ एक वर्षभर धमाका उडणार आहे. अख्खं वर्ष तालुका निवडणुकांनी ढवळून निघणार आहे.

कोरोनामुळे विकास सेवा सोसायटी, जिल्हा परिषद, पंचायत समिती आणि कृषी उत्पन्न बाजार समितीच्या निवडणुका पुढे ढकलल्या होत्या. सध्या कोरोनाची लाट ओसरल्यामुळे स्थानिक स्वराज्य संस्थांच्या निवडणुका घेण्यासाठी हालचाली सुरू झाल्या आहेत. तसं २०२२ हे वर्ष निवडणुकांनीच गाजणार आहे. अख्ख्या वर्षभर कोणत्या ना कोणत्या एकापाठोपाठ एक निवडणुका सुरू असणार आहेत. वर्षाची सुरवातच विकास सेवा सोसायटीच्या निवडणुकीने झाली होती. तालुक्यात ६९ विकास सेवा सोसायट्या आहेत. यातील कोरोनाच्या अगोदर पंधरा संस्थांच्या निवडणुका झाल्या होत्या.

राहिलेल्या सोसायट्यांच्या गेल्या चार महिन्यांपासून सुरू आहेत. रोज एखाद-दुसऱ्या गावात सोसायटीच्या निवडणुकीच्या प्रचाराचा धुरळा उडत आहे. संस्थेच्या निवडणुका अंतिम टप्प्यात आल्या आहेत. सध्या बाजार समितीवर प्रशासक आहे. २० जूनपर्यंत सर्व सोसायट्यांच्या निवडणुका पार पडणार आहेत. त्यानंतर बाजार समिती निवडणुकीसाठी मतदार याद्या प्रसिद्ध करणे, हरकती मागवण्यासह निवडणूक प्रक्रिया सुरू होईल, असा अंदाज आहे. दरम्यान, जिल्हा परिषद आणि पंचायत समितीच्या निवडणुका होणार आहेत. यापूर्वी तालुक्यात जिल्हा परिषदेचे चार गट आणि पंचायत समितीचे आठ गण होते; मात्र नवीन पुनर्रचित आराखड्यानुसार पाच जिल्हा परिषद गट आणि दहा पंचायत समितीच्या गणांत निवडणुका जुलैमध्ये होऊ शकतात. जिल्हा परिषद आणि पंचायत समितीच्या निवडणुका होईपर्यंत बाजार समितीच्या याद्या प्रसिद्ध होऊन निवडणुका जाहीर होतील. त्यानंतर दिवाळीच्या दरम्यान कधीही बाजार समितीच्या निवडणुका होतील.