चित्री प्रकल्पात मोटार कोसळली अन्...

आजरा ( कोल्हापूर ) - चित्री येथील प्रकल्पात मोटार कोसळून प्राथमिक शिक्षकाचा मृत्यू झाला. आप्पासाहेब ऊर्फ प्रकाश ईश्‍वर शिंदे (वय 48 रा. महागाव ता. गडहिंग्लज) असे मृत शिक्षकाचे नाव आहे. आज दुपारी 12 च्या सुमारास मोटार सुरू करत असताना चालक शिंदे यांचा ताबा सुटल्याने अपघात घडला. पाच तासांच्या अथक प्रयत्नानंतर मोटार व मृतदेह पाण्याबाहेर काढण्यात पोलिस आणि स्थानिकांना यश आले. अशोक शिंदे यांनी फिर्याद दिली. 

आप्पासाहेब हे भावाचा मुलगा अथर्व शिंदे (10) व शेजारील सौरव टक्केकर (14) यांना सोबत घेऊन आज रविवार सुटीचा दिवस असल्याने मोटारीने (एमएच 01-जी ए 5992) चित्री प्रकल्पावर पर्यटनासाठी गेले होते. ते चित्रीच्या बॅक वॉटरच्या बाजूने आवंडी धनगरवाड्याकडे जाणाऱ्या रस्त्यावर धरणापासून पाचशे मीटर अंतरावर त्यांची मोटार बंद पडली. त्यांनी मोटारीतील अथर्व व सौरभ यांना खाली उतरून समोरील बाजूला धक्का मारण्यास सांगितले. या वेळी मोटार अचानकपणे सुरू झाली. चालक शिंदे यांचा मोटारीवरील ताबा सुटला व मोटार थेट वीस फूट खोल पाण्यात कोसळून उलटली. अथर्व व सौरभ यांनी आरडा ओरड केल्यावर उपस्थित पर्यटकांनी घटनास्थळी धाव घेतली. त्या दोघांनी घरी भ्रमणध्वनीवरून अपघाताची माहिती घरच्यांना दिली.

हेही वाचा - आर. आर. आबांच्या लेकीला पुत्ररत्न ! 

गुदमरून मृत्यू

दरम्यान, पोलिस निरीक्षक बालाजी भांगे पथकासह घटनास्थळी पोचले. बोटीद्वारे पाण्यात मोटारीचा शोध घेतला. मोटारीला बांधून ट्रॅक्‍टरने ग्रामस्थांनी पाण्याबाहेर काढली. शिंदे यांना मोटारमधून बाहेर पडता न आल्याने त्यांचा गुदमरून मृत्यू झाला. आप्पासाहेब हे उंबरवाडी येथील शाळेत शिक्षक होते. त्यांच्या मागे पत्नी, मुलगा, मुलगी व वडील असा परिवार आहे. त्यांच्या मृत्यूची बातमी समजताच महागाव परिसरात शोककळा पसरली. शांत व मनमिळावू स्वभावाचे असल्याने घटनास्थळावर मित्रपरिवाराची मोठी गर्दी झाली होती. सहायक पोलिस उपनिरीक्षक पांडुरंग दोरुगडे अधिक तपास करीत आहेत. 

हेही वाचा - ॲन्टीबायोटिक इंजेक्‍शनमुळे पाच विद्यार्थी अत्यवस्थ