अभिनंदन...'या' शेतकऱ्याने वाचवले हजारो प्रवाशांचे जीव

सोलापूर : मनमाडहून नगरच्या दिशेने जाणारी भुसावळ-पुणे एक्‍स्प्रेस मंगळवारी (ता. 10) वांबोरीहून नगरच्या दिशेने जात होती. त्यावेळी तेथून रेल्वे लाईन क्रॉस करून आपल्या शेतातील पिकांना पाणी देण्यासाठी जात असताना रामदास बापुराव थोरात (रा. विळद, ता. नगर) यांना किलोमीटर 369.0-1 विळद-वांबोरी दरम्यान रेल्वे रूळ तुटल्याचे दिसले. रामदास यांनी त्याची समोरुन येणारी गाडी थांबविली आणि पुढील अपघात टळला.


हेही वाचाच...लक्षात ठेवा...विमा कंपनीचा चार हजार कोटींचा क्‍लेम !


वीजेचे लोडशेडींग असल्याने शेतात जायची ओढ लागली असल्याने रामदास लगबगीने रेल्वे रुळ ओलांडून पुढे जात होते. त्याचवेळी रुळावरुन रेल्वे येत असल्याने काहीतरी आवाज आला. त्यांनी बाजूला पाहिले तेव्हा रुळ तुटल्याचे दिसले. दरम्यान, भुसावळ-पुणे एक्‍स्प्रेस भरधाव वेगाने येत होती. त्याचवेळी रामदास यांनी शक्‍कल लढविली आणि जिवाची पर्वा न करता अंगातील बनियन काढून गाडी थांबविली. बनियनचा रंग लाल असल्याने तो हातात घेऊन रेल्वेच्या दिशेने धावत सुटले. वयाने आणि शरीराने दांडगे असल्याने त्यांचा दमही भरला होता. मात्र, त्यांनी हजारो जीव वाचविण्याच्या उद्देशाने जिद्द सोडली नाही. त्याचवेळी रेल्वे रुळावरून आपल्या दिशेने कोणीतरी लाल बनियन घेऊन धावत येत असल्याचे चालकाच्या लक्षात आले. घटनेचे गांभीर्य ओळखून चालकाने अर्जंट ब्रेक दाबून गाडीचा वेग कमी केला आणि थोड्या अंतरावर गाडी थांबली. त्यानंतर रेल्वे चालकाने या प्रकाराची माहिती वरिष्ठ अधिकाऱ्यांना दिली आणि रुळ दुरुस्ती करुन गाडी पुढे धावली.

हेही वाचाच...वाहनांची मॅन्युअली तपासणी होणार बंद


रेल्वे प्रशासन करणार रामदास यांचा सन्मान
नगर जिल्ह्यातील विळद येथील शेतकरी रामदास बापूराव थोरात यांनी जिद्द अन्‌ चिकाटीच्या जोरावर भुसावळ-पुणे एक्‍स्प्रेस थांबवली आणि हजारो प्रवाशांचे जीव वाचवले. त्यांच्या कार्याचे कौतूक प्रवाशांसह रेल्वे प्रशासनाने केले. श्री. थोरात यांचा मध्य रेल्वेच्या सोलापूर येथील कार्यालयात श्री. थोरात यांचा प्रमाणपत्र व चार हजार रुपये रोखीने देऊन सन्मान केला जाणार आहे.