वाहनांची मॅन्युअली तपासणी होणार बंद 

सोलापूर : वाहन निरीक्षकांद्वारे मॅन्युअली पध्दतीने होणारी वाहनांची तपासणी आता कालबाह्य होणार असून वाढते अपघात कमी करण्यासाठी आता वाहनांची शास्त्रोक्‍त तपासणी केली जाणार आहे. सोलापूरसह नगर, पनवेल, ठाणे, पुणे, नागपूर अशा मोठ्या शहरांमध्ये ऍटोमेटेड इन्स्पेक्‍शन सेंटर उभारले जाणार आहेत. त्यासाठी पुण्यातील ऍटोमोटिव्ह रिसर्च ऑफ इंडिया (एआरएआय) या संस्थेची केंद्रीय वाहतूक मंत्रालयाने नियुक्‍ती केली आहे. 

हेही वाचाच... 'स्टॅण्डअप'साठी नवउद्योजकांच्या नशिबी हेलपाटेच 

देशातील रस्ते अपघातांमध्ये महाराष्ट्र टॉप टेनमध्ये आहे. महाराष्ट्रात दरवर्षी सरासरी 35 हजारांहून अधिक रस्ते अपघातांमध्ये सुमारे 16 हजार जणांचा मृत्यू होत असल्याची माहिती राष्ट्रीय महामार्ग पोलिस सूत्रांनी दिली. दुचाकी, स्कूल बस, एसटी बस, ट्रक, कार अशा वाहनांच्या अपघातांचे प्रमाण मागील तीन-चार वर्षांपासून सातत्याने वाढतच आहे. त्यामुळे वाहनांच्या तांत्रिकदृष्ट्या तपासणीवर प्रश्‍नचिन्ह उपस्थित होऊ लागले. दुसरीकडे काही अधिकारी पैसे घेऊन वाहनांना फिटनेस प्रमाणपत्र देत असल्याचे आरोपही झाले. या पार्श्‍वभूमीवर आता वाहनांची शास्त्रोक्‍त पडताळणी करण्याच्या उद्देशाने राज्यभरात ऍटोमेटेड इन्स्पेक्‍शन सेंटरची उभारणी करण्याचा निर्णय केंद्रीय वाहतूक मंत्रालयाने घेतला. त्यासाठी पुण्यातील 'एआरएआय' या संस्थेची नियुक्‍ती करण्यात आली आहे. या संस्थेतर्फे प्रत्येक जिल्ह्यातील प्रादेशिक व उपप्रादेशिक परिवहन कार्यालयातील एका अधिकाऱ्याला प्रशिक्षण दिले जाणार आहे. 

हेही वाचाच...लक्षात ठेवा...विमा कंपनीचा चार हजार कोटींचा क्‍लेम ! 

ठळक बाबी... 
- वाढत्या अपघातांवरील नियंत्रणासाठी राज्यभरात होणार ऍटोमेटेड इन्स्पेक्‍शन सेंटर 
- ऍटोमेटेड इन्स्पेक्‍शन सेंटर उभारणीसाठी प्रत्येकी किमान 22 ते 25 कोटींचा खर्च अपेक्षित 
- पुण्यातील 'एआरएआय' या संस्थेकडे राज्यातील सेंटर उभारणीची जबाबदारी 
- स्कूल बस तपासणीसाठी लागणारा 30 मिनिटांचा वेळ आता 15 मिनिटांनी होणार कमी 
- जिल्हास्तरावरील प्रास्तावित केंद्रांचा अहवाल 'एआरएआय'च्या मार्फत परिवहन आयुक्‍तांना जाणार 

हेही वाचाच...अरेच्चा...एमबीएच्या प्राध्यापकांना जमेना गुणांची बेरीज 

राज्यातील सर्व नव्या वाहनांची तपासणी करण्याची जबाबदारी केंद्रीय वाहतूक मंत्रालयाने पुण्यातील 'एआरएआय' या संस्थेकडे सोपविली आहे. सोलापुरात ऍटोमेटेड इन्स्पेक्‍शन सेंटर होणार असल्याने प्रत्येक वाहन निरीक्षकांवरील 22 वाहनांच्या तपासणीचे बंधन राहणार नाही. या सेंटरमुळे वाहनांची तपासणी कमी वेळेत आणि शास्त्रोक्‍त होईल. 
- संजय डोळे, उपप्रादेशिक परिवहन अधिकारी, सोलापूर