पृथ्वीराज चव्हाणांचा गड आणखी मजबूत, भाजप पराभूत

कऱ्हाड : अटीतटीच्या झालेल्या तालुक्यातील मलकापूर पालिकेच्या निवडणुकीत भाजपवर मात करत काँग्रेसच्या पॅनेलने विजय खेचून आणला. दोन्ही पक्षांसाठी ही निवडणुक प्रतिष्ठेची बनवली होती. माजी मुख्यमंत्री आमदार पृथ्वीराज चव्हाण यांना आगामी विधानसभेपूर्वी धक्का देण्याच्या दृष्टीने भाजपतर्फे विठ्ठल रूक्मिणी मंदीर ट्रस्टचे अध्यक्ष अतुल भोसले यांच्या माध्यमातून पूर्ण ताकदीने उतरली होती. मात्र प्रत्यक्षात भाजपला पाचच जागांवर समाधान मानावे लागले. काँग्रेसने नगराध्यक्षपदासही 14 जागांवर विजय मिळवत सत्ता प्रस्थापित केली.

काँग्रेसच्या नगराध्यक्षपदाच्या उमेदवार निलम येडगे यांनी 270 मतांनी विजय मिळवत भाजपच्या डॉ. सारीका गावडे यांचा पराभव केला. येडगे यांना 7747 तर गावडे यांना 7477 मते मिळाली. त्याशिवाय नऊ प्रभागातील प्रभाग क्रमांक एक, तीन, चार, सहा व नऊमध्ये काँग्रेसचे उमेदावर विजयी झाले. भाजपने प्रभाग क्रमांक दोन, व आठमध्ये विजय मिळवला. त्यात प्रभाग क्रमांक पाचमध्ये एक उमेदवार काँग्रेसचा तर एक भाजपचा विजयी झाला. त्यामुळे भाजपचे पाच तर काँग्रेसचे 14 उमेदवार विजयी झाले. प्रभाग क्रमांक चारमध्ये काँग्रेसच्या भारती पाटील व भाजपच्या अवंतिका घाडगे यांना 662 अशी समान मते मिळाली. त्यांचा निकाल चिठ्ठीव्दारे जाहीर करण्यात आला.

निवडणूक निर्णय अधिकारी हिम्मत खराडे यांनी त्या दोघींच्या नावाच्या चिठ्ठ्या तयार करून त्या बॉक्समध्ये टाकल्या. चार वर्षांची लहान मुलगी आराध्या जाधवतर्फे एक चिठ्ठी उघडण्यात आली. ती चिठ्ठी भारती पाटील यांच्या नावाची होती. त्यामुळे त्यांना विजयी घोषित करण्यात आले. विजय अपेक्षित होता. मात्र आम्ही थोडे कमी पडलो, त्यामुळे पूर्ण यश मिळवता आले नाही, असे काँग्रेसच्या पॅनेलचे नेते मनोहर शिंदे यांनी पत्रकारांशी बोलताना सांगितले ते म्हणाले, माजी मुख्यमंत्री आमदार पृथ्वीराज चव्हाण यांच्यासह माजी आमदार विलासराव पाटील-उंडाळकर, आमदार बाळासाहेब पाटील यांच्या केलेली आघाडी महत्वाची ठरली.