साईंच्या शिर्डीतही आढळली कोरोना संशयित 

शिर्डी ः कोरोनासदृश आजाराची लक्षणे दिसल्याने शहरातील लक्ष्मीनगर वसाहतीमधील साठ वर्षे वयाच्या महिलेला आज सायंकाळी साडेसातच्या सुमारास नगर येथील जिल्हा रुग्णालयात पाठविण्यात आले आहे. त्यानंतर लगेचच तेथील रहिवाशांनी घरे बंद केली.

उपनगराध्यक्ष मंगेश त्रिभुवन यांनी तातडीने हालचाल केल्यानंतर परिसरात नगरपंचायतीच्या यंत्रणेने औषधफवारणी केली. 
संबंधित महिला गेल्या महिनाभरापासून कोल्हार येथील नातेवाइकांकडे वास्तव्यास होती. तेथून आल्यानंतर खोकला व ताप येऊ लागल्याने तिने सावळीविहीर येथील प्राथमिक आरोग्य केंद्रात जाऊन उपचार घेतले.

हेही वाचा - कर्जत तालुक्यात विजांच्या कडकडाटासह पाऊस

तेथील डॉ. भिंगारदिवे यांना या महिलेस कोरोनाची लक्षणे दिसत असल्याची शंका आल्याने, त्यांनी पोलिस व नगरपंचायत यंत्रणेच्या मदतीने सरकारी रुग्णवाहिकेतून तिला नगरला हलविले. 
या भागातील रहिवाशांनी बाहेर कुठेही जाऊ नये, असे आवाहन राहाता ग्रामीण रुग्णालयाचे वैद्यकीय अधीक्षक गोकुळ घोगरे यांनी केले आहे.

दरम्यान, संबंधित महिला कुठे कुठे गेली होती, कुणाच्या संपर्कात आली होती, याचा शोध घेतला जात आहे. या महिलेच्या हातावर सलाईनची सुई लावलेली होती. डॉ. घोगरे यांना मिळालेल्या माहितीनुसार तिने साईबाबा संस्थानाच्या रुग्णालयात उपचार घेतले, की अन्य कोणत्या रुग्णालयात गेली होती, याची खातरजमा केली जाणार आहे. 

दिलासा मिळाला

रात्री उशिरा त्या महिलेची तपासणी करण्यात आली. त्यात तिला कार्डियाक अस्थमा निघाला आहे. त्यामुळे शिर्डीकरांनी सुटकेचा निश्वास सोडला. त्या महिलेच्या हातावर क्वॉरंटाइनचा शिक्का मारला असून तिला घरी सोडण्यात आल्याचे वैद्यकीय सूत्रांनी सांगितलं.