दुर्दैवी! हुंड्याच्या छळाला कंटाळून नवविवाहितेची आत्महत्या, 5 जणांविरोधात गुन्हा दाखल

बेळगाव - पतीसह सासरच्या मंडळींकडून हुंड्यासाठी सातत्याने होणाऱ्या छळाला कंटाळून नवविवाहितेने गळफास घेऊन आत्महत्या केली. रविवार (ता.११) हालभावी येथे ही घटना घडली असून रेणूका भरमाप्पा नायक (वय २०, रा. हालभावी) असे तीचे नाव असून या प्रकरणी काकती पोलिसात हुंडाबळी कायद्याअंतर्गत पाच जणांविरोधात गुन्हा दाखल झाला आहे.

मयत रेणुकाचे वडील बाळाप्पा हुलेप्पा नायक (रा. हुल्यानुर) यानी पोलिसात फिर्याद दिली आहे. त्यानुसार पोलिसानी पती भरमाप्पा मुशाप्पा नायक नातेवाईक सिध्दाप्पा भरमाप्पा नायक, दिर हालप्पा मुशाप्पा नायक, यल्लाप्पा मुशाप्पा नायक, नंनद कमलव्वा हलाप्पा नायक (सर्वजण रा. हालभावी) यांच्याविरोधात गुन्हा दाखल करुन घेतला आहे. हुल्यानुर येथील रेणुकाचा अवघ्या सहा महिन्यांपुर्वी हालभावी येथील भरमाप्पा याच्याबरोबर विवाह झाला.

लग्न झालेल्या दिवसापासूनच पतीसह सासरच्या मंडळीनी तीचा हुंड्यासाठी छळ चालवला होता. माहेरहून सोन्‍याचे दागिने घेऊन ये अशी वारंवार मागणी करत होते. दागिने आणले नाहीस तर आपल्या घरी येऊ नकोस कुठेतरी जाऊन जीव दे. आम्ही भरमाप्पाचा दुसरा विवाह करुन देतो. तु आमच्‍या घरी येऊ नको. असे म्हणत तीचा छळ चालवला होता. वारंवार वाद घालून करुन तिला मानसिक त्रास दिला जात होता.

रेणुकाचे वडील गवंडी काम करतात त्यामुळे तिच्या माहेरची परिस्थिती बेताची आहे. त्यामुळे सोन्याचे दागिने आणायचे कोठून असा सवाल तिच्यापुढे होता. त्यामुळे दररोजच्‍या छळाला कंटाळून मानसिक अस्वस्थपणातून काल सासरी तुळईला ओढणी बांधून गळफास घेऊन आत्महत्या केली.

या घटनेची माहिती समजताच काकतीचे पोलिस निरीक्षक आय. एस. गुरुनाथ व त्यांच्या सहकाऱ्यांनी घटनास्थळी भेट देऊन पंचनामा केला. घटनेची खबर तिच्या माहेरी कळवण्यात आली. वडिलांनी दिलेल्या फिर्यादीनंतर कायदेशीर सोपस्कार पुर्ण करण्यात आले. त्यानंतर जिल्हा रुग्णालयातील शवागृहात शल्यचिकित्सा करुन मृतदेह नातेवाईकांच्या ताब्यात देण्यात आला. यावेळी तिच्या आई वडिलांनी केलेला आक्रोश काळज पिळवटून टाकणारा होता.