स्कूल व्हॅनमध्ये गॅस भरताना सिलिंडरचा स्फोट 

सोलापूर : जुनी मिल कंपाउंड परिसरात घरगुती गॅस सिलिंडरमधून वाहनाच्या सिलिंडरमध्ये गॅस भरताना स्फोट होऊन स्कूल व्हॅन पेटली. ही घटना बुधवारी दुपारच्या सुमारास घडली. 

नागेश करजगी ऑर्किड स्कूलसमोर विद्यार्थी वाहतूक करणाऱ्या व्हॅनमध्ये (एमएच 14-पी 1036) गॅस भरण्याचे काम सुरू होते. अचानक स्फोट होऊन व्हॅनला आग लागली. चालक गणेश मधुकर मोरे (वय 38, रा. हौसे वस्ती, आमराई, सोलापूर) हा जखमी झाला. चालक मोरे हा दुपारी दोन वाजता विद्यार्थी घेऊन जाण्यासाठी आला होता. शाळा सुटायच्या अगोदर तो व्हॅनमध्ये गॅस भरत होता. गॅस लिकेज झाल्याने स्फोट होऊन वाहनाने पेट घेतला. हा प्रकार लक्षात येताच शाळेतील शिपायाने तत्काळ अग्निशमन दलास कळविले. अवघ्या 10 मिनिटांत पाण्याचे बंब पोचले. व्हॅनमध्ये विद्यार्थी नसल्याने मोठा अनर्थ टळला. चालक गणेश मोरे यास उपचारासाठी शासकीय रुग्णालयात दाखल केले. 

मी मुलाला शाळेतून घ्यायला गेलो होतो. व्हॅन चालक गॅस भरत होता. अचानक स्फोट होऊन सिलिंडर लांब फेकला गेला. व्हॅनने पेट घेतला. चालकाचा हात भाजला. सोलापुरात सर्रास घरगुती गॅसचा वापर स्कूल व्हॅन, रिक्षामध्ये होत आहे. पालकांनी याचा विचार करण्याची आवश्‍यकता आहे. 
- महेश सावंत, पालक