सततच्या धुक्यामुळे पिकांवर परिणाम ; शेतकरी चिंतेत

दहिवडी (जि. सातारा) : आज (शुक्रवार) पहाटेपासूनच दहिवडीसह माण तालुक्यातील बहुतांशी परिसर धुक्याच्या चादरीत हरवून गेला. तर थंडीच्या लाटेने सर्वांना हुडहुडी भरली. वातावरण आल्हादायक असले तरी पिकांवर होणारा विपरित परिणामामुळे शेतकर्यांच्या तोंडचे पाणी पळाले आहे.
 

सध्या वातावरणात होत असलेल्या सततच्या बदलामुळे जनजीवन विस्कळीत झाले आहे. पहाटे पासून सकाळ पर्यंत हुडहुडी भरवणारी थंडी असते. तर त्यानंतर उन्हाचा तडाखा सुरु होतो. सायंकाळच्या सुमारास ढग दाटून येतात. मोठ्या प्रमाणात दव पडते. अधूनमधून धुक्याची गडद चादर सर्व व्यापून टाकते.

जरुर वाचा - Video : हुतात्मा संदीप सावंत यांच्या आठवणीने विजय दिवस चाैक गहिवरला

आजही (शुक्रवार) पहाटेपासूनच थंडीत कमालीची वाढ झालेली होती. त्यातच संपुर्ण परिसर धुक्याच्या दाट चादरीत हरवून गेला होता. काही फुट अंतरावरील दिसणं सुध्दा अवघड झालं होतं. त्यातच थंडगार हवेसोबत थंडीच्या लाटावर लाटा येत होत्या. त्यामुळे थंडीची तीव्रता कमालीची वाढली होती. सकाळच्या वेळी नित्यनियमाची शेती वा जनावरांची करावयाची कामे करण्यासाठी सुध्दा बाहेर पडण्यासाठी शेतकरी अनुत्सुक दिसत होते. अशा वातावरणातही शालेय व महाविद्यालयीन विद्यार्थ्यांची मात्र लगबग सुरु होती. वाहने मात्र लाईट लावूनच ये-जा करताना दिसत होती.

हेही वाचा : Video : चला फ्लेमिंगोसह रंगबेरंगी पक्षी निरीक्षणासाठी

या विचित्र वातावरणाचा शेतीवर मात्र अत्यंत विपरित परिणाम होणार आहे. कांद्यावर बुरशी व करपा, वाटाण्यावर बुरशी व कीड, गव्हावर तांबेरा, ज्वारीवर चिकटा आदी रोगांसह कीडींचा, अळीचा मोठ्या प्रमाणावर प्रादुर्भाव होण्याची शक्यता आहे. यंदा निसर्गाच्या लहरीपणामुळे अगोदरच मेटाकुटीस आलेल्या शेतकर्यांचे यामुळे कंबरडे मोडण्याची शक्यता आहे. किटकनाशक, तणनाशक फवारुन शेतकरी दमून गेले आहेत. या सर्व परिस्थितीमुळे शेतकर्यांना मोठ्या आर्थिक नुकसानीस सामोरे जावे लागत आहे.