शालेय पोषण आहार चुलीवरच..
नगर : शाळांमध्ये पोषणआहार गॅसच्या माध्यमातून शिजवावा, असे शासनाचे निर्देश असतानाही जिल्ह्यातील सुमारे साडेसहाशे शाळांमध्ये अद्याप चुलीवरच आहार शिजविला जात आहे.
जिल्ह्यात 4464 शाळांना शालेय पोषणआहार योजना लागू आहे. या सर्व शाळांमध्ये पोषणआहार गॅस शेगडीवर शिजविण्यात यावा, असे शासनाचे निर्देश असले, तरी शासनाकडून अद्याप अनेक शाळांना गॅस उपलब्ध झालेला नाही. त्यामुळे साडेसहाशे शाळांमध्ये चुलीवरच पोषणआहार शिजविला जात आहे. जिल्ह्यातील 3481 शाळांमध्ये शासन अनुदानातून गॅसची जोडणी देण्यात आली असून, 337 शाळांना लोकसहभागातून गॅसजोडणी देण्यात आलेली आहे. अशा एकूण 3818 शाळांना गॅसजोडणी दिलेली आहे.
एकाच सिलिंडरमुळे गोंधळ
जिल्ह्यातील शाळांना शासन अनुदानातून व लोकसहभागातून गॅसजोडणी देण्यात आली आहे. काही शाळांकडे एकच गॅस सिलिंडर आहे. ते संपल्यानंतर दुसरे सिलिंडर मिळण्यासाठी प्रतीक्षा करावी लागते. या काळात या शाळांना चुलीवरच पोषणआहार शिजवावा लागत आहे.
जाणून घ्या- नाही खर्चली कवडी दमडी
अकोल्यात सर्वाधिक शाळा गॅसविना
जिल्ह्यातील चौदा तालुक्यांपैकी अकोले तालुक्यातील 148 शाळांना अद्यापही गॅसजोडणी मिळालेली नाही. त्यामुळे या सर्व शाळांमधील शालेय पोषणआहार चुलीवरच शिजविला जात आहे. नगर तालुक्यातील 283 शाळांमध्ये गॅस सिलिंडर उपलब्ध असल्याने पोषणआहार गॅसवर शिजविला जातो.
शाळांकडून होतेय प्रदूषण
पर्यावरण दिनाच्या निमित्ताने पर्यावरणाचा समतोल राखण्याचा संदेश देणाऱ्या शाळांमध्येच चुलीवर आहार शिजवून हवा प्रदूषित केली जात आहे. चुलीवर आहार शिजविण्याच्या प्रक्रियेमुळे शाळांमध्ये काही ठिकाणी धूर होत असल्याने, त्याचा त्रास विद्यार्थ्यांना सहन करावा लागतो.
- शालेय पोषणआहार लागू असलेल्या शाळा- 4464
- शासनाची अनुदानित गॅसजोडणी दिलेल्या शाळा- 3481
- लोकसहभागातून गॅसजोडणी मिळालेल्या शाळा - 337
- गॅसजोडणी नसलेल्या शाळा - 646
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.