पालकमंत्री जयंत पाटील यांच्या दौऱ्यावर भाजपचा बहिष्कार

सांगली : पालकमंत्री जयंत पाटील यांच्याविरोधात आज भाजपच्या महापालिका आणि जिल्हा परिषदेतील सदस्यांनी बहिष्काराचे अस्त्र उगारले आहे. महापालिकेतील "करेक्‍ट' कार्यक्रमानंतर झालेल्या सत्ताबदलानंतर भाजप आक्रमक झाला असून त्याचे पडसाद आज सकाळी सरपंच परिषद व रुग्णवाहिका लोकार्पण सोहळ्यात दिसून आले. दरम्यान जिल्हा परिषदेच्या या कार्यक्रमास भाजपचे खासदार संजय पाटील आणि भाजपच्या सत्तेत सहभागी असलेले शिवसेनेचे नेते अजितराव घोरपडे गटाचे सदस्य मात्र हजर होते.

पालकमंत्री पाटील यांचे आज महापालिका आणि जिल्हा परिषदेत कार्यक्रम आहेत. त्यापैकी जिल्हा परिषदेचा कार्यक्रम येथील डेक्कन हॉलमध्ये सुरु आहे. या कार्यक्रमात खासदार पाटील समर्थक सुरेंद्र वाळवेकर, अरुण बालटे, सरदार पाटील, प्रमोद शेंडगे तर घोरपडे समर्थक आरोग्य समितीच्या सभापती आशा पाटील उपस्थित होत्या. जिल्हा परिषद अध्यक्षा प्राजक्ता कोरे, उपाध्यक्ष शिवाजी डोंगरे मात्र गैरहजर होते. भाजपचा हा बहिष्कारा पवित्रा कालच शहर जिल्हाध्यक्ष दीपक शिंदे-म्हैसाळकर यांनी जाहीर केला होता. त्यांनी दरम्यान दुपारी बारा ते अडीच दरम्यान महापालिकेत होणाऱ्या आढावा बैठकीवरही भाजप बहिष्कार टाकणार असल्याचे जाहीर केले आहे.

हेही वाचा- लॉकडाउनची वर्षपूर्ती : ‘तो’ काळ अंगावर शहारे आणणारा!

स्वागतासाठी  जंगी तयारी

मंत्री पाटील यांच्या स्वागतासाठी महापालिकेत जंगी तयारी केली आहे. रेड कार्पेट टाकून स्वागत करण्यात येणार आहे. पालकमंत्री झाल्यापासून आणि महापालिकेत महापौर-उपमहापौर निवड झाल्यानंतर कॉंग्रेस आघाडीची सत्ता आली आहे.

संपादन- अर्चना बनगे