त्याला वीस वर्षे सक्‍तमजुरी

नगर : इयत्ता दुसरीत शिकत असलेल्या मुलीवर बलात्कार केल्याच्या गुन्ह्यात पस्तीस वर्षीय आरोपीला दोषी धरीत जिल्हा न्यायालयाने वीस वर्षे सक्‍तमजुरी व एक लाख रुपये दंडाची शिक्षा ठोठावली. दंडाची रक्कम पीडित मुलीला देण्याचा आदेश न्यायालयाने दिला. मनोज हरिहर शुक्‍ला (वय 35, रा. भरसाळ, जि. गोरखपूर, उत्तर प्रदेश), असे आरोपीचे नाव आहे. 

हे पाहा माळढोक प्रश्‍न आमदार पवारांनी हाती घेतला 

पीडित मुलीचे आई-वडील नेपाळमधील रहिवासी आहेत. ते रोजगारासाठी पारनेर तालुक्‍यात आले होते. मुलीचे वडील हॉटेलमध्ये आचारी होते. मुलगी पारनेर येथील शाळेत शिकत होती. 11 मे 2017 रोजी सकाळी साडेदहा वाजता आई घरात काम करीत असताना पीडित मुलगी घराबाहेर बसली होती. त्या वेळी शेजारी राहणारा आरोपी मनोज शुक्‍ला मुलीला चॉकलेट देण्याच्या बहाण्याने त्याच्या खोलीत घेऊन गेला. आईला बाहेर आल्यानंतर मुलगी दिसली नाही. तिने इतरत्र शोध घेतला असता मुलगी आरोपीच्या खोलीमध्ये आढळून आली. त्या वेळी आरोपीने खोलीला आतून कडी लावली होती. आईने विचारपूस केल्यानंतर तिने घडलेला प्रकार सांगितला.

येथे क्‍लिक करा लव्ह मॅरेज ते सायबर क्राईम 

आईने दिलेल्या फिर्यादीनुसार 12 मे 2017 रोजी पारनेर पोलिस ठाण्यात गुन्हा दाखल झाला. पोलिस उपनिरीक्षक आर. डी. पवार यांनी तपास करून दोषारोपपत्र न्यायालयात सादर केले. खटल्याची सुनावणी प्रधान जिल्हा न्यायाधीश श्रीकांत आणेकर यांच्यासमोर झाली. सरकार पक्षातर्फे पाच साक्षीदार तपासण्यात आले. सरकार पक्षाचा युक्तिवाद आणि पुरावे ग्राह्य धरून न्यायालयाने आरोपीला दोषी धरीत वरीलप्रमाणे शिक्षा सुनावली. सरकार पक्षातर्फे सहायक सरकारी अभियोक्ता ऍड. अनिल सरोदे यांनी बाजू मांडली. या खटल्यात सरकारी वकिलांना सहाय्य करण्यासाठी पैरवी अधिकारी म्हणून सहायक पोलिस उपनिरीक्षक लक्ष्मण काशीद यांची नियुक्ती करण्यात आली होती. 

हेही वाचा अण्णा हजारे यांचे आजपासून मौन 

दोन महिन्यांत आरोपीला शिक्षा 
खटल्याचे कामकाज सुरू झाल्यापासून दोन महिने व सात दिवसांमध्ये सुनावणी झाली. त्यात प्रत्यक्ष सहा दिवस सुनावणी झाली. दोन महिन्यांत खटल्याचा निकाल लागला आणि आरोपीला शिक्षा झाली. 

...कमी अवधीत निकाल लागला असता
खटला सुनावणीला आल्यानंतर पीडित मुलगी सहा वर्षांची असल्याने न्यायालयाने विलंब न करता साक्षीदारांचे साक्षी-पुरावे नोंदविले. यापेक्षाही कमी कालावधीत खटल्याचा निकाल लागला असता परंतु, पीडित मुलगी नेपाळ येथे वास्तव्यास असल्याने तिला घेऊन येण्यास जास्त कालावधी लागला. खटल्यात पीडिता आणि तिची आई यांची साक्ष व न्यायवैद्यकीय अहवाल महत्त्वाचा ठरला. 
- ऍड. अनिल सरोदे, सहायक सरकारी अभियोक्ता