सूर्यग्रहण पाहताना काेणती काळजी घ्यावी ..?

सांगली : येत्या २६ डिसेंबरला कंकणाकृती सूर्यग्रहण पाहण्याची पर्वणी आहे. समाजातील प्रचलित समजुती बाजूला ठेवून प्रत्येकाने हा आनंद लुटावा. मात्र त्याआधी थोडी काळजी घ्या. दक्षता घ्या. केवळ डोळ्यांनी कंकणाकृती सूर्यग्रहण पाहू नका. सूर्य प्रकाशातील अतिनील किरणांनी डोळ्यांतील कॉर्निया या नाजूक पटलास इजा होऊन दृष्टिदोष निर्माण होऊ शकतो.

सोलार फिल्टर्स उपलब्ध नसल्यास आरशाच्या साहाय्याने घरातील भिंतीवर सूर्याचे प्रतिबिंब घेऊन त्यामधे ग्रहण पाहावे.
ग्रहणांबद्दल समाजात अजूनही पारंपरिक समजुती आढळतात. आता त्या गैर आणि कालबाह्य ठरल्या आहेत. खगोल विज्ञानात त्यांना कसलाही आधार नाही. त्यामुळे, डोळ्यांची योग्य ती काळजी घेऊन सूर्य ग्रहण पाहिल्यास त्यापासून कोणासही कधीही, कसलाही अपाय होत नाही.

 क्लिक करा  - Video : दहा वर्षांचा ऋषिकेश गाजवतो अश्‍वावर हुकूमत

गरोदर स्त्रियांना  वाटणारी भीती अनाठायी
गरोदर स्त्रियांना ग्रहण काळात वाटणारी भीती अनाठायी आहे. वास्तविक ग्रहण पाळण्याच्या अट्टाहासामुळे शारीरिक हालचाल, अन्न-पाणी ग्रहण, मल-मूत्र विसर्जन आदी गोष्टींना मज्जाव करणे हे निसर्गाच्या विरुद्ध आहे. अज्ञानापोटी, भीतीपोटी ग्रहण पाळल्यामुळे अनेकदा गरोदर स्त्रियांना नाहक प्राण गमवावे लागले असल्याची उदाहरणे दर वेळी पाहायला मिळतात.ग्रहण पाळले नाही तर गर्भात विकृती निर्माण होतात असाही एक गैरसमज प्रचलित आहे. गर्भाच्या अशा विकृतींमागील कारणे वेगळी असतात.

हेही वाचा - नांदेडमधील अंतिम पैसेवारी पन्नास पैशांच्याखाली

अज्ञान दूर ठेवून आनंद घेणे गरजेचे

मातेने सेवन केलेली प्रतिजैविके Antibiotics, विविध औषधे, आणि गुणसूत्रांतील बिघाडांमुळे गर्भात विकृती संभवते. ग्रहणांमुळे नाही.ग्रहण हा प्रकाश व सावली मधील लपंडावाचा खेळ आहे. ग्रहण काळात ‘सूर्य-चंद्रा सोबत नाश्‍ता’ करूयात, असे पुण्यातील ‘नव निर्मिती’ या विज्ञान प्रसाराचं काम करणाऱ्या संस्थेने आवाहन केले आहे. महाराष्ट्रातील हौशी खगोल निरीक्षकांनी व निसर्ग प्रेमिंनी असे ग्रहण काळातील नाश्‍त्याचे प्रयोग यापूर्वी अनेकदा केलेले आहेत.

शंकर शेलार, खगोल अभ्यासक