मंत्रिपदाच्या तुकड्यासाठी भाजपमध्ये आलेलो नाही : शिवेंद्रराजे

सातारा : ''कोणत्याही वैयक्तिक फायद्यासाठी नाही, तर सातारच्या जनतेसाठी मी हा निर्णय घेतला. कोणत्याही मंत्रिपदाच्या तुकड्यासाठी मी भाजपमध्ये आलेलो नाही. त्यामुळे संपूर्ण माहिती घेऊन टीका करावी. आम्ही शिकार करून खाणारी औलाद आहोत, हे सर्वांनी लक्षात घ्यावे,'' असा घणाघात शिवेंद्रराजे भोसले यांनी सातारा येथे केला. भारतीय जनता पक्षाची महाजनादेश यात्रा रविवारी (ता.15) सातारा येथे पोहोचली. त्यानिमित्ताने सातारा सैनिकी शाळा येथे आयोजित जाहीर सभेत ते बोलत होते. 

- राज्याचा औद्योगिक विकास घसरला - पृथ्वीराज चव्हाण​

यावेळी मुख्यमंत्री देवेंद्र फडणवीस, सहकारमंत्री चंद्रकांत पाटील, माजी खासदार छत्रपती उदयनराजे भोसले, माढ्याचे खासदार रणजितसिंह नाईक-निंबाळकर, आमदार जयकुमार गोरे, जलसंपदामंत्री गिरीश महाजन यांची व्यासपीठावर प्रमुख उपस्थिती होती.

- निवडणूक लढण्याबाबत आदित्य ठाकरे म्हणाले,...

शिवेंद्रराजे पुढे म्हणाले, मराठा आरक्षणासारखा प्रलंबित विषय मुख्यमंत्री फडणवीस यांनी मार्गी लावला. त्यामुळे आता सातारा जिल्हा आपल्याकडे अपेक्षेने पाहत आहे. सातारा शहरातील तरूण रोजगारानिमित्त जिल्ह्याबाहेर जात आहे. त्याच्या हाताला जर इथेच काम मिळाले, तर तो जिल्ह्यातच थांबेल. साताऱ्यातील एमआयडीसीचा विकास व्हावा आणि मेडिकल कॉलेजचा प्रलंबित विषय मार्गी लावावा, या मागण्या आम्ही मुख्यमंत्र्यांकडे केल्या आहेत. आता सातारा जिल्हा हा भाजपमय होईल, असा विश्वास वाटतो.

- आता जनतेच ठरलंय; कोल्हापूर उत्तरमधून 'यांना' आमदार करायचं!