Highway Authority : रिंगरोडसाठी होणार 1500 हून अधिक झाडांची कत्तल; शेतकऱ्यांचा तीव्र विरोध

बेळगाव : रिंगरोडच्या (Ring Road) पहिल्या टप्प्यातील कामासाठी शिवारातील विविध प्रकारची पंधराशेहून अधिक झाडे तोडली जाणार आहेत. त्यासाठी शिवारात जाऊन प्रत्येक झाडावर (Tree) क्रमांक घातला जात आहे. शेतकऱ्यांचा विरोध असूनही महामार्ग प्राधिकरण काम पुढे रेटत असल्याचे चित्र आहे.

बेळगाव (Belgaum) तालुक्यातील ३१ गावांमधून रिंगरोड होणार आहे; मात्र रिंगरोडला शेतकऱ्यांचा पूर्णपणे विरोध होत आहे, तरीही महामार्ग प्राधिकरणाने पहिल्या टप्प्यातील कामासाठी निविदा प्रक्रिया राबविली आहे. संबंधित कंत्राटदाराला वेळेत काम पूर्ण करण्याच्या सूचना करण्यात आल्या आहेत. त्यामुळे गेल्या काही दिवसांपासून सर्वेक्षण केले जात आहेत.

तसेच शेतकऱ्यांना (Farmers) कोणत्याही प्रकारे विश्वासात न घेता झाडांवर क्रमांक घातले जात असून, याबाबत विचारणा केली असता कोणत्याही प्रकारची माहिती दिली जात नसल्याने शेतकरी वर्गातून नाराजी व्यक्त होत आहे.

गेल्या काही दिवसांपूर्वी विविध भागांत सर्वेक्षणासाठी आलेल्या कर्मचाऱ्यांना व अधिकाऱ्यांना शेतकऱ्यांनी माघारी पाठविले होते; मात्र पुन्हा एकदा जीपीएस तंत्रज्ञानाच्या माध्यमातून सर्वेक्षण होत असल्याचे दिसून येत आहे. त्यामुळे शेतकऱ्यांनी सजग राहण्याची गरज निर्माण झाली आहे. तसेच प्रत्येक गावातून जास्तीत जास्त याचिका दाखल व्हाव्यात यासाठी प्रयत्न करावेत, असे मत व्यक्त होत आहे.

रिंगरोडविरोधात याचिका दाखल करण्यासाठी शेतकऱ्यांनी मोठ्या प्रमाणात पुढे यावे, असे आवाहन केले होते; मात्र काही शेतकऱ्यांनीच याचिका दाखल केल्या आहेत. त्यामुळे महामार्ग प्राधिकरण रिंगरोड करण्याचा प्रयत्न करीत आहे. ते टाळण्यासाठी अधिक प्रमाणात याचिका दाखल होणे आवश्यक आहे.

-मनोहर किणेकर, माजी आमदार