आटपाडी तालुक्यातील 102 शेतकऱ्यांवर कारवाई

झरे (सांगली) : आटपाडी तालुक्यातील विकास सोसायटीकडून पिक कर्ज व मध्यम मुदतीचे कर्ज १०२ शेतकऱ्यांकडे थकीत आहे. त्याची सरासरी २ कोटी ३० लाख ६३ हजार रुपये रक्कम होत असून वसुलीसाठी विकास सोसायटीमार्फत १०१ कलमांतर्गत कारवाई करण्यात आली आहे. प्रत्येक थकबाकीदार सभासदाची सुनावणी सहायक निबंधक कार्यालयात सुरू आहे.

सततचा दुष्काळ, पिण्याच्या पाण्यासाठी टॅंकर सुरू असताना दुष्काळात अनेकांच्या द्राक्षबागा डाळिंब बागा पाण्याविना जळून गेल्या. मागील वर्षी मुबलक असा पाऊस पडला तोही नुकसान करून गेला. दुष्काळात लावलेल्या बागा वाया गेल्या, पिके वाया गेली, चाऱ्याअभावी जनावरे कसाबच्या दावणीला गेली. अशा परिस्थितीमध्ये शेतकऱ्याने जगायचं कसं? असा गंभीर प्रश्न निर्माण झाला होता.

शासनाने कर्जमाफी जाहीर केली परंतु त्यामध्ये अनेक जाचक अटी घातल्याने अनेक शेतकरी कर्जमाफी पासून वंचित राहिले. ज्या शेतकऱ्यांना दोन वेळचे खाणं मिळणेही मुश्कील झाले. अशा शेतकऱ्यांनी कर्ज भरायचे कसे? असा गंभीर प्रश्न बनला असताना सध्या विकास सोसायटीने मात्र वसुलीचा तगादा लावला असून थकबाकीदारांवर केली आहे. विकास सोसायटीने शेतकऱ्यांशी संपर्क साधून तोडगा काढण्याची गरज आहे.

आटपाडी तालुक्याची दुष्काळी तालुका म्हणून ओळख आहे. सध्या काही भागांमध्ये टेंभूचे पाणी आले आहे, म्हणजे सर्व तालुक्यांमध्ये टेंभूचे पाणी आले असे नाही. त्यामुळे अनेक ठिकाणी अजूनही पाण्याची भीषण टंचाई आहे. या सर्व बाबीचा विचार करून विकास सोसायटीने थकबाकीदार कर्जदारांच्या वर कारवाई थांबून सामोपचाराने प्रश्न मार्गी लावावा, अशी मागणी शेतकऱ्यांतून होत आहे.

आटपाडी तालुक्यांमध्ये १०२ शेतकऱ्यांवर १०१ कलमांतर्गत कारवाई करण्यात आली आहे. या शेतकऱ्यांच्याकडे दोन कोटी ३० लाख ६३ हजार रुपये येणे बाकी आहे.

- बी. डी. मोहीते, सहायक निबंधक अधिकारी, आटपाडी