धक्कादायक! पुरोगामी कोल्हापुरात बालविवाह करून मुलीला केलं गरोदर; नवऱ्यासह पाच जणांवर गुन्हा

कोल्हापूर : देशाच्या कानाकोपऱ्यात आजही बालविवाहाला (Child Marriage) मोठ्या प्रमाणात प्राधान्य दिलं जात आहे. बालविवाहावर बंदी असून अनेकांकडून या कायद्याचं उल्लंघन केलं जात आहे. असाच धक्कादायक प्रकार पुरोगामी कोल्हापुरात घडला असून नागरिकांतून रोष व्यक्त होतं आहे.

राजर्षी शाहूंच्या कोल्हापूर जिल्ह्यात मान खाली घालावी, अशा घटना दिवसेंदिवस वाढताना दिसताहेत. कोल्हापूर जिल्ह्यातील (Kolhapur District) दऱ्याचे वडगाव (Vadgaon) इथं एक धक्कादायक घटना समोर आलीय. अवघ्या 14 वर्षांच्या मुलीशी लग्न करत गरोदर केल्याची घटना समोर आलीय.

अवघ्या साडेबाराव्या वर्षात झालं लग्न

दरम्यान, तिचं अवघ्या साडेबाराव्या वर्षात लग्न झाल्याचंही उघड झालंय. या घटनेनं कोल्हापूर जिल्ह्यात शाहू महाराजांनी घालून दिलेल्या शिकवणींना गालबोट लागत असल्याचं दिसून येत आहे. याबाबत प्राथमिक आरोग्य केंद्रात तपासणी वेळी डॉक्टरांना शंका आल्याने त्यांनी अधिक तपासणी केली. यावरून बालविवाहाचा प्रकार उघड झालाय. या घटनेबाबत पोलीस ठाण्यात गुन्हा नोंद झाला असून अल्पवयीन मुलीचा नवरा, आई, वडिलांसह पाच जणांवर गुन्हे दाखल झाले आहेत.