Govind Pansare Case; पानसरे हत्या प्रकरणी 2 मार्चला पुढील सुनावणी

कोल्हापूर : काही महत्त्वाच्या कागदपत्रांसह इलेक्ट्रॉनिक पुराव्यांची माहिती सरकार पक्षातर्फे मिळावी, असा अर्ज आज ज्येष्ठ नेते गोविंद पानसरे (Govind Pansare) हत्या प्रकरणातील संशयित आरोपींच्या वकिलांनी न्यायालयात सादर केला. यावर झालेल्या सुनावणीत 23 तारखेपासून आज पर्यंत न्यायालयात सादर केलेले सर्व पुरावे देण्याबाबत सरकार पक्षातर्फे सहमती दर्शविण्यात आली. अतिरिक्त सत्र न्यायाधीश बी. डी. शेळके (B.D.Shelke) यांच्या न्यायालयात (Court)ही सुनावणी झाली. पुढील सुनावणी दोन मार्चला होईल.

दोषारोप निश्चित करण्यासंदर्भात मागील सुनावणीवेळी आरोपीचे वकील समीर पटवर्धन (Sameer Patwardhan) यांनी तिन्ही आरोपींना दोषमुक्त करावे असा अर्ज दाखल केला होता. या अर्जावर आज सुनावणी होईल अशी शक्यता होती मात्र, ॲड.पटवर्धन आजारी असल्यामुळे ते आज न्यायालयात हजर राहू शकले नाहीत. त्यांच्या ठिकाणी ॲड.वीरेंद्र इचलकरंजीकर यांनी न्यायालयात हजर राहून दोषारोप निश्चित करण्यापूर्वी सरकार पक्षाकडून काही महत्त्वाच्या पुराव्याची कागदपत्रे, इलेक्ट्रॉनिक्स पुरावे आम्हाला मिळालेले नाहीत ते मिळावेत अशी मागणी न्यायालयाकडे केली.

यावेळी सरकार पक्षातर्फे विशेष सरकारी वकील शिवाजीराव राणे (Shivajirao Rane) यांनी जसा तपास होईल त्या पद्धतीचे पुरावे दोषारोप पत्रामध्ये दाखल केले आहेत, तरीही काही पुरावे आरोपींना मिळाले नसले तर ते देण्याची व्यवस्था केली जाईल असे स्पष्ट केले. यानंतर ॲड. इचलकरंजीकर यांनी पुरावे मिळाल्यानंतर काही दिवसांनी सुनावणी घ्यावी, अशी मागणी केली.यावर वकील राणे आणि इचलकरंजीकर यांनी पुढील सुनावणी 2 मार्चला व्हावी अशी मागणी न्यायालयाकडे केली.