कोल्हापूर: हिमोफिलियाचे इंजेक्शन मिळणार आता सीपीआरमध्ये

कोल्हापूर : येथील छत्रपती प्रमिलाराजे रुग्णालय (सीपीआर) मध्ये हिमोफेलिया या रुग्णांच्या उपचारासाठी लागणाऱ्या इंजेक्शन (फॅक्टर) चा लोकार्पण सोहळा आज स्वातंत्र्यदिनी पालकमंत्री सतेज पाटील यांच्या उपस्थितीत झाला.

सीपीआर, हिमोफेलिया सोसायटी, हिमोफेलिया फेडरेशन,( नवी दिल्ली) यांच्या सहकार्यातून हा उपक्रम हाती घेण्यात आला आहे. हिमोफिलिया या अनुवंशिक आजारासाठी लागणारे फॅक्टर इंजेक्शन आता सीपीआर येथे उपलब्ध करुन देण्यात आले आहे. या इंजेक्शनमुळे सांगली, सातारा, सिंधुदुर्ग, बेळगाव येथीलही रुग्णांची सोय होणार आहे.

सोहळ्यात पालकमंत्री पाटील म्हणाले,कोल्हापूर जिल्हा ही दातृत्वाची भुमी आहे. कोविड परिस्थितीत सीपीआर रुग्णालयाने उत्कृष्ठ कामगिरी बजावली आहे. अशातच हिमोफिलियाच्या अनुवंशिक रुग्णांवरही उपचार करण्याचा चांगला निर्णय या रुग्णालयाने घेतला आहे. पालकमंत्री या नात्याने या रुग्णांना आरोग्य‍ विषयक चांगल्या सुविधा देण्यासाठी प्रयत्न करणार आहे.

पुढे ते म्हणाले, कोरोनाच्या संभाव्य तिसऱ्या लाटेचा विचार करता सीपीआरमध्ये नॉन कोविडसाठी राखीव बेड ठेवण्यात यावेत. त्याचबरोबर राज्यात ज्या ठिकाणी या आजारावर उपचार करण्यात येतात अशा 10 ठिकाणची माहिती देण्यात यावी. जेणेकरुन या रुग्णांवर उपचार करणे सोईचे होईल. सध्या जिल्ह्यात या आजाराच्या 200 हून अधिक रुग्णांवर उपचार सुरु असून या उपचारांच्या व रुग्णांच्या अनुषंगाने आरोग्य मंत्र्यांचीही भेट घेणार आहे.

तत्पूर्वी या आजाराच्या उपचारार्थ रुग्णांसाठी सीपीआरमध्ये 10 कायम स्वरुपी बेड राखीव ठेवण्यात आले असल्याची माहिती शासकीय वैद्यकीय महाविद्यालयाचे अधिष्ठाता डॉ. एस. एस. मोरे यांनी दिली. यावेळी आमदार चंद्रकांत जाधव, जिल्हा शल्य चिकित्सक डॉ. अनिल माळी डॉ गिरीराज काकडे, हिमोफेलिया सोसायटीचे अध्यक्ष रामू गडकर डॉ. वरुण बाफणा, डॉ. महेंद्र बनसोडे, डॉ. मोहन पाटील, डॉ. मोहन बर्गे यांच्यासह सीपीआर मधील सर्व डॉक्टर्स, हिमोफेलिया सोसायटीचे सदस्य उपस्थित होते.