रहेंगे तो महाराष्ट्र मे नही तो जेल में; म. ए. समितीतर्फे धरणे आंदोलन

कोल्हापूर : रहेंगे तो महाराष्ट्र मे नही तो जेल में, खानापूर, बेळगाव, निपाणी, बिदर, भालकीसह संयुक्त महाराष्ट्र झालाच पाहिजे, कोण म्हणतंय होत नाही झाल्याशिवाय राहत नाही, अशा घोषणा देत महाराष्ट्र एकीकरण समितीतर्फे ऐतिहासिक दसरा चौकात आज धरणे आंदोलन करण्यात आले.

या वेळी राष्ट्रवादी काँग्रेसचे आर. के. पोवार म्हणाले, "अनेक वर्षे कर्नाटकातील गावे महाराष्ट्रात येणार असे ऐकत आलो आहोत. संयुक्त महाराष्ट्राच्या आंदोलनात पोलिसांच्या काठ्या आम्ही अंगावर झेलल्या आहेत. कर्नाटक राज्याने ठराव करुन सर्व फलक कन्नडमध्ये केले आहेत. ते मराठी भाषिकांना वाचता येत नाहीत. त्यांना अजूनही न्याय मिळालेला नाही. ज्येष्ठ नेते शरद पवार यांनी या प्रश्नातून मार्ग काढण्याचे नियोजन केले होते. त्यावर अद्याप निर्णय झालेला नाही."

काॅंग्रेसचे शहराध्यक्ष सचिन चव्हाण म्हणाले, " सीमावासीयांच्या भावना तीव्र आहेत. त्या पालकमंत्री सतेज पाटील यांच्यापर्यंत नक्कीच पोचवल्या जातील. सीमावासियांना काँग्रेस पक्षाचा पाठिंबा आहे." अनिल घाटगे यांनी मराठी भाषिकांच्या भावना मांडून त्यांच्यासोबत असल्याचा विश्‍वास दिला.

यावेळी अॅड गुलाबराव घोरपडे, संध्या घोटणे, मधूकर रामाणे, मुरलीधर पाटील, महादेव घाडी, अर्जुन देसाई, विलास बेळगावकर, मऱ्याप्पा पाटील, किरण गवळीगिर, चंद्रकांत गुंडकल, म्हात्रू झुंगरचे, मनोज पावशे, अशोक पाटील, पिराजी मुचंडीकर, दिगंबर पाटील, प्रकाश चव्हाण, यशवंत बिर्जे, विशाल पाटील, विवेक गिरी आंदोलनात सहभागी झाले होते.

आंदोलनात १९५७ च्या सीमा लढ्यातील जेलभरो आंदोलनात सहभागी झालेले पुंडलिक चव्हाण, नारायण लाड, शंकर पाटील, नारायण पाटील, शिवाजी पाटील, देवाप्पा घाडी सहभागी झाले होते. त्यांनी मराठी भाषिकांच्या भावना मांडून संयुक्त महाराष्ट्र झालाच पाहिजे, अशी मागणी केली.