Kolhapur Farmhouse Raid : फार्महाऊसवरील छाप्यात पोलिसांचे ‘तोडपाणी’ सात पोलिस चौकशीच्या फेऱ्यात ; संशयितांना मदत केल्याचा प्रकार

कोल्हापूर : फार्महाऊसवर टाकलेल्या छाप्यानंतर तोडपाणी करण्याऱ्या इस्पुर्ली पोलिस ठाण्याच्या एका उपनिरीक्षकासह सात पोलिसांचा कारनामा उघडकीस आला आहे. या प्रकाराची चौकशी करण्याचे आदेश थेट पोलिस अधीक्षकांनी दिले असून, करवीरचे उपअधीक्षक आप्पासो पवार यांनी जबाब नोंदविण्याचे काम सुरू केले आहे. यापूर्वीही फार्महाऊस मालकांकडून पैसे उकळल्याच्या तक्रारी आल्याने तिघांवर निलंबनाची कारवाई झाली होती.

इस्पुर्ली पोलिसांच्या कामकाजाबद्दल प्रचंड नाराजीचा सूर उमटू लागला आहे. इस्पुर्ली पोलिस ठाण्याच्या पथकाने सोमवारी रात्री दिंडनेर्लीतील ‘व्ही फार्म’ या फार्महाऊसवर छापा टाकला होता. चार महिलांसह दहा जणांना पकडण्यात आले. याप्रकरणी पंधरा संशयितांवर गुन्हाही दाखल झाला आहे. या गुन्ह्यात संशयितांची नावे बदलण्याचा प्रकार समोर आल्याने याची तक्रार थेट पोलिस अधीक्षक नीलोत्पल यांच्याकडे झाली.

याची गांभीर्याने दखल घेत फार्महाऊसमधील सीसीटीव्ही फुटेज तपासण्याचे आदेश देण्यात आले. उपअधीक्षक पवार यांच्याकडे या सर्व प्रकरणाचा तपास सोपविण्यात आला आहे. एक पोलिस उपनिरीक्षक, पाच अंमलदार आणि गोपनीय विभागाचा पोलिस अशांची चौकशी केली जाणार आहे.

कोणाचीही गय केली जाणार नाही ः पवार कारवाई केल्यानंतर त्यामध्ये काही फेरफार केल्याचे आरोप झाले आहेत. या प्रकरणाची चौकशी सुरू केली असून, प्रत्यक्षदर्शींचे जबाबही नोंदविण्याचे काम सुरू केले आहे. याची सखोल चौकशी करून अहवाल वरिष्ठांना पाठविला जाईल. दोषींची कसलीही गय केली जाणार नाही, असे करवीर उपअधीक्षक आप्पासो पवार यांनी सांगितले.