Karnataka Congress: लोकसभा निवडणुकीपूर्वी ॲक्सीटेंड होऊन काँग्रेस सरकार कोसळणार; भाजप नेत्याचा दावा

बेळगाव: काँग्रेस सरकार पाच वर्षे कार्यकाळ पूर्ण करणार नाही. लोकसभा निवडणुकीनंतर किंवा लोकसभा निवडणुकीपूर्वी ॲक्सीटेंड (अपघात) होऊन सरकार पडेल, असा दावा विजयपूरचे आमदार बसनगौडा पाटील यत्नाळ यांनी केला.

बेळगाव येथील गांधी भवनमध्ये रविवारी भाजप कार्यकर्त्यांच्या सभेला उद्देशून ते बोलत होते. सिद्धरामय्या मुख्यमंत्रीपदाचा राजीनामा देणार नाहीत. तर दुसरीकडे डी. के. शिवकुमार शांत बसणार नाहीत.

गॅरंटी योजनांची इतिश्री झाली आहे. गॅरंटी योजनांची हमी देणे शक्य नाही. कोणतेही सरकार सत्तेत आले तरी त्यांना गॅरंटी योजना राबविता येणार नाहीत.

गॅरंटी योजनेमुळे कर्नाटकामध्ये अराजकता सुरू झाली आहे. या स्वरुपाच्या घोषणा बसवराज बोम्मई यांनाही जाहीर करता आल्या असत्या. मात्र, ज्या गोष्टींची कार्यवाही शक्य नाही, त्याची घोषणा न करणे योग्य आहे, असे यत्नाळ

यांनी सांगितले. आगामी लोकसभा निवडणुकीत राज्यातून २८ पैकी २८ जागा या जिंकून देऊन परत पंतप्रधान नरेंद्र मोदी यांच्याहाती देशाची सुत्रे द्यावी, असे आवाहन केले.

आमच्या पक्षात काही अतृप्त आत्मा आहेत. पक्षाच्याच उमेदवारांचा पराभव करण्यासाठी धडपडत आहेत. मात्र, मतदार संघामध्ये न जाता निवडून आलो आहे. विधानसभा निवडणुकीत भाजपचा पराभव झाला आहे, म्हणून घरामध्ये बसून कसे चालेल. आपण सर्वांनी मिळून आजपासून काम सुरु करून पक्षाला परत सत्तेत आणावे, असे आवाहन केले.