Kolhapur Crime : अल्पवयीन मुलीचा गर्भपात? प्रकरण दडपण्याचा प्रयत्न; पोलिसांच्या हाती लागणार महत्वाचे धागेदोरे

कोल्हापूर : अल्पवयीन मुलीचा गर्भपात (Minor Girl Abortion) झाला आहे की नाही याचा तपास पोलिसांकडून सुरू झाला आहे. तपास अधिकाऱ्यांची बदली झाल्यामुळे हा तपास थांबला होता. आता महिला तपास अधिकाऱ्यांनी तपासाची सूत्रे हाती घेतली आहेत.

लवकरच त्यांच्याकडून तपास पूर्ण करून न्यायालयात दोषारोप पत्र दाखल केले जाईल. प्रकरण दडपण्याचा कोणताही प्रकार होणार नाही. अशी माहिती संबंधित वरिष्ठ पोलिस (Kolhapur Police) अधिकाऱ्यांनी ‘सकाळ’ शी बोलताना दिली.

‘अल्पवयीन मुलीचा गर्भपात? ’या मथळ्याखाली काल ‘सकाळ’ मध्ये गर्भपात झाल्याचा संशय व्यक्त करण्यात आला आहे. यासाठी काही महत्वाचे धागेदोरेही पुढे येत असल्याचीही माहिती या वृत्तात दिली आहे. याबाबत अधिक माहितीसाठी आज संबंधित वरिष्ठ पोलिस अधिकाऱ्यांशी संवाद साधला.

त्यांनी सांगितले, की या संदर्भात पोक्सो अंतर्गत गुन्हा दाखल झाला आहे. त्यासाठी आवश्‍यक वैद्यकीय अहवालासह तपासासाठी अन्य आवश्‍यक माहिती घेतली जात आहे. यामध्ये संबंधित पीडितासह डॉक्टरांची माहिती, जाबजबाब, शासकीय वैद्यकीय अहवालही विचारात घेतले जाणार आहेत. मूळ तपास अधिकाऱ्याची बदली झाली. त्यामुळे काही दिवस तपास थांबला होता.

आता महिला पोलिस अधिकाऱ्यांनी तपासाची सूत्रे हाती घेतली आहेत. त्यांनी तपास सुरू केला आहे. कागदोपत्री पुरावे जमा केले जात आहेत. आवश्‍यक पुराव्यानुसार गुन्हे दाखल होतील, तसेच दोषारोप पत्रात त्याचे संदर्भ दिले जातील. कोणतेही प्रकरण दडपले जाणार नाही. तसा प्रयत्नही होत नाही.