कोल्हापूर : आरोग्याची रौप्यमहोत्सवी वारी

कोल्हापूर : येथील सद्‌गुरू विश्वनाथ महाराज रुकडीकर ट्रस्टच्या माध्यमातून सुरू झालेल्या वारीचे यंदा रौप्यमहोत्सवी वर्ष आहे. वारी मार्गावरील गावांत आरोग्य तपासणी व शाळांमध्ये संस्कार शिबिरांचे आयोजन हे या वारीचे वैशिष्ट्य आहे. यंदाही शुक्रवारी या वारीचे प्रस्थान झाले आहे. वारी मार्गावरील शाळांमध्ये वृक्षारोपणसाठी रोपेही या दिंडीतर्फे वितरित केली जातात.

श्री सद्‌गुरू दादा महाराज सांगवडेकर यांनी पंचवीस वर्षांपूर्वी मुनिंद्र विश्वनाथ महाराज यांच्या पादुका घेऊन कोल्हापुरातून या दिंडीला सुरुवात केली. यंदाच्या दिंडीत सहाशेहून अधिक वारकरी आणि सेवेकरी सहभागी झाले असून, श्री सद्‌गुरू आनंदनाथ महाराज यांच्या मार्गदर्शनाखाली ही दिंडी मार्गस्थ झाली. श्री सद्‌गुरू विश्वनाथ महाराज रुकडीकर ट्रस्ट, श्री सद्‌गुरू दादा महाराज सांगवडेकर सेवा प्रतिष्ठान व श्री विश्ववती आयुर्वेदिक चिकित्सालय व रिसर्च सेंटर या संस्थेच्या माध्यमातून वारी मार्गावर मुक्कामाच्या ठिकाणी आरोग्य तपासणी शिबिरांचे आयोजन केले आहे. पेठवडगाव, भिलवडी आणि त्यानंतर आज तासगाव, भिलवडी येथे आरोग्य शिबिर झाले. त्याला मोठा प्रतिसाद मिळाला. येत्या पाच दिवसांत आरवडे, करंजे, आटपाडी, दिघंची, शेरेवाडी, महूद आदी ठिकाणी ही शिबिरे होणार आहेत.

विद्यार्थी हे देशाचे भवितव्य असतात. त्यामुळे ते मानसिकदृष्ट्या आणि शारीरिकदृष्ट्या सशक्त असणे महत्त्‍वाचे आहे. या पार्श्वभूमीवर आता वारी मार्गावरील शाळांमध्ये चिकित्सालयाचे अध्यक्ष निरंजनदास सांगवडेकर यांच्या मार्गदर्शनाखाली संस्कार शिबिराचे आयोजन केले जाते. त्यालाही शालेय विद्यार्थ्यांचा मोठा प्रतिसाद मिळतो आहे.